Mınıstrler sońǵy ret qantty neshe teńgeden satyp alǵanyn aıtty

NUR-SULTAN. QazAqparat – Ortalyq kommýnıkatsııalar qyzmetinde ótip jatqan brıfıngide QR Premer-Mınıstriniń orynbasary – Saýda jáne ıntegratsııa mınıstri Baqyt Sultanov pen Aýyl sharýashylyǵy mınıstri Erbol Qarashókeev qantty qanshalyqty jıi qoldanatynyn aıtty , dep habarlaıdy QazAqparat tilshisi.

«Jalpy «qant joq» dep aıta berýge bolmaıdy. «Halva, halva» degennen aýzyńa tátti dám kelmeıdi» degen sóz bar ǵoı. Sol sııaqty «joq-joq»degen saıyn halyq senip, dúrbeleń týady. Óz basym jýyqta ǵana iri saýda jelisine baryp, bir keli qantty 470 teńgege satyp aldym. Ol kezde sondaı baǵa bolǵan. Qazirgi aqparat boıynsha baǵa 480 teńge bolypty. Ony kórip-bilip otyrmyn. Men ózim shaı ishkende qant qoldanbaımyn, balmen ishem», - dedi Baqyt Sultanov.

Al Erbol Qarashókeevke odan sál qymbat qant buıyrǵan kórinedi.

«Sońǵy ret qanttyń kelisin úlken bir saýda júıesinen 620 teńgeniń kóleminde satyp aldyq. Al 1000 teńgeden úılerdiń astyndaǵy shaǵyn dúkenderde satylyp jatyr. Olar kóterme baǵamen satyp ala almaıdy. Sondyqtan ekinshi, úshinshi qoldan alyp, osyndaı baǵamen jatyr. Sonda sońǵy ret qantty 620 teńgeden satyp aldym. Shaıdy qantsyz ishemin», - dedi Aýyl sharýashylyǵy mınıstri.

Buǵan deıin Úkimettiń keńeıtilgen otyrysynda Memleket basshysy Qasym-Jomart Toqaev qant tapshylyǵyn retteı almaǵan Saýda jáne ıntegratsııa mınıstri Baqyt Sultanov pen Aýyl sharýashylyǵy mınıstri Erbol Qarashókeevke sógis jarııalaǵan edi.

Foto: ortcom.kz