Mınıstrler mıllıardtaǵan qarjyny eki aptanyń ishinde ıgerýge ýáde etti
QR Qarjy mınıstri Álıxan Smaıylovtyń aıtýynsha, bıyl on bir aıdyń ishinde 107 mıllıard teńge ıgerilmeı otyr. Atalǵan qarjynyń basym bóligi QR Qorǵanys mınıstriligi, QR Іshki ister mınıstrligi, QR Bilim jáne ǵylym mınıstriligi, QR Aýyl sharýashylyǵy mınıstrligi, QR Mádenıet jáne sport mınıstrligi, Astana, Túrkistan, Qyzylorda men Shymkent qalalary, sondaı-aq, Mańǵystaý men Pavlodar oblystaryna tıesili.
«Qarajatty ıgermeýdiń negizgi sebepteri - jumystar, qyzmetter men taýarlardy ýaqytynda jetkizbeý, sondaı-aq, sharttardy uzaq kelisý. Qarjy jylynyń sońyna deıin 12 jumys kúni qaldy. Osy ýaqyttyń ishinde ortalyq jáne jergilikti organdar 800 mlrd teńgege jýyq qarajatty ıgerýi qajet. Sondyqtan qalǵan ýaqytta osy máselege asa úlken nazar aýdaryp, belsendi jumys atqarý kerek», - dedi Á.Smaıylov.
QR Premer-Mınıstri Baqytjan Saǵyntaev árbir mınıstrden ıgerilmeı qalǵan qarjyǵa qatysty esep berýdi surady. QR Qorǵanys mınıstrligi jyldyń aıaǵyna deıin 40 mlrd teńgeni tolyǵymen ıgerýge múddeli. Al QR Іshki ister mınıstri Qalmuxambet Qasymov ıgerilmeı jatqan qarjynyń sebebin túsindirdi.
«Bizde 13 mıllıard, onyń ishinde Ulttyq gvardııanyń 7 mıllıardy. Myna bizde xattama bar. Qazınjınırıng pen Qazspetsekport 20 jeltoqsanǵa deıin zattardy alyp keledi. Sosyn tótenshe jaǵdaılardyń 2,5 mıllıardy, onyń ishinde 1,9 mıllıardy boıynsha qazir qaýlyny daıyndap jatyrmyz. Ony qaıtaramyz. Polıtsııa boıynsha taǵy 1,2 mıllıard bar. Qazir barlyq satyp alǵan zattarymyz qoımalarda jatyr. Qalǵany 1,2 mıllıardy, ol «tekýşıı rasxod» deımiz. Onyń bárin oryndaımyz», - dedi Q.Qasymov.
QR Bilim jáne ǵylym mınıstri Erlan Saǵadıevtiń sózine qaraǵanda, basynda 11 mlrd teńge ıgerilmeı jatty. 10 jeltoqsanǵa deıin 7 mlrd teńge joǵary oqý oryndaryna jiberildi. Ol aqshaǵa jańa aqparattyq avtomattandyrý júıesi engiziledi.
«Sony durystap toltyrmaı, sodan kishkene ýaqyt boıynsha keshigip otyrmyz. Tolyǵymen oryndalady», - dep atap kórsetti E.Saǵadıev.
QR Aýyl sharýashylyǵy mınıstrligi de 8 mıllıard teńgesin tolyǵymen ıgeremiz dep otyr.
«Sonyń 2 mıllıard 190 mıllıon teńgesi sý sharýashylyǵynda ekinshi deńgeıli bankterde jatyr. Kepildikter kerek bolyp tur. Merdigerler áli ala almaı jatyr. 1 mıllıard 600 mıllıony aktilerdi kútip otyr. Sodan keıin ǵylym salasynda 1 mıllıard 200 mıllıony anaý VNTK-nyń keshikkenine baılanysty. Jyldyń aıaǵyna deıin tolyq jabamyz dep otyrmyz», - deıdi mınıstr Ómirzaq Shókeev.
QR Mádenıet jáne sport mınıstri Arystanbek Muxamedıuly da 8 mıllıard teńgeniń ıgerilmeı jatýyna sebep bolǵan jaǵdaılardy túsindirdi. Onyń aıtýynsha, jyldyń aıaǵyna deıin barlyq qarjy ıgeriledi.
«Bizderde negizgi josparlar ol - Táýelsizdik kúni, Jańa jyldyń aldynda merekelik sharalar kóp qoı. Solarǵa baılanysty. Sosyn joǵary oqý oryndarynyń jyldyń aıaǵynda alatyn zattary... Ulttyq mýzeı de bar. Bári ıgeriledi, Baqytjan Ábdiruly», - dep atap kórsetti A.Muxamedıuly.
