Mınıstrler men Nur-Sultan ákimi júrek reanımatsııasyn jasaýdy úırendi
NUR-SULTAN. QazAqparat – QR Densaýlyq saqtaý mınıstri Eljan Birtanov, Bilim jáne ǵylym mıınstri Ashat Aımaǵambetov jáne elorda ákimi Altaı Kólginov Amerıkalyq kardıologııalyq qaýymdastyq (American Heart Association) uıymdastyrǵan júrek reanımatsııasynyń bazalyq kýrsynan ótti, dep habarlaıdy QazAqparat tilshisi.
QR DSM Ulttyq shuǵyl medıtsına úılestirý ortalyǵynda TMD aýmaǵynda alǵash ret Amerıkalyq kardıologııalyq qaýymdastyǵy akkredıtatsııalaǵan bazalyq jáne keńeıtilgen júrek reanımatsııasyn (BLS, ACLS) oqytý boıynsha halyqaralyq trenıngtik ortalyq ashyldy. Ortalyqtyń alǵashqy bilim alýshylary elimizdiń birqatar mınıstri men elorda ákimi boldy.
TMD aýmaǵynda balamasy joq ortalyq medıtsına qyzmetkerlerine jáne jalpy respýblıka halqyna reanımatsııanyń (BLS) bazalyq kómegin úıretýdi kózdeıdi.
«Biz Qazaqstanda kardıologııalyq, júrek-tamyr aýrýlary, ólim-jitim faktileri jıi kezdesetinin túsinemiz. Sondyqtan adamdarǵa durys kómek kórsetýdi, júrek-ókpe reanımatsııasyn tez jáne tıimdi jasaý joldaryn úıretýimiz kerek. Qazaqstannyń turǵyndary, dárigerleri men medıtsına qyzmetkerleri bul oqytýdyń álemdik tájirıbege saı júrgiziletinin eskerýi tıis. Oqytý aldyńǵy qatarly ǵylymı málimetterge negizdelgen», - dedi Qazaqstandaǵy Amerıkalyq kardıologııalyq qaýymdastyqtyń halyqaralyq oqytý ortalyǵynyń basshysy Kevın Freık tilshilerge bergen suhbatynda.
Halyqaralyq trenıngtik ortalyq Qazaqstan halqynyń qan aınalymy júıesi aýrýlarynan, onyń ishinde emdeýge deıingi kezeńde qaıtys bolý faktilerin azaıtý maqsatynda ashylǵan. QR Densaýlyq saqtaý mınıstrligi men Amerıkalyq kardıologııalyq qaýymdastyq (AHA) yntymaqtastyq týraly memorandýmǵa qol qoıdy.
