Mınıstrler men ákimder yńǵaısyz suraqtan jaltarmaýy kerek - saıasattanýshy

NUR-SULTAN. QazAqparat – Mınıstrler men ákimderdiń ashyq suraqqa ashyq jaýap berýi qalypty jaǵdaıǵa aınalýy kerek. Saıasattanýshy Danııar Áshimbaev áleýmettik jelide birneshe mınıstrdiń BAQ ókilderine bergen jaýaptarynan keıin týyndaǵan pikirtalas boıynsha osyndaı paıym aıtty, dep habarlaıdy QazAqparat tilshisi.

«Keıbir BAQ pen blogerler keıbir mınıstrler men ákimderdiń jýrnalısterge bergen jaýabyn kekesinge aınaldyryp jatyr. Halyqtyń bir bóligine qant týraly (Sultanov, Jumanǵarın), mektep formasy týraly (Aımaǵambetov), jaryqtan ajyratý faktisi týraly (Dosaev) suraqtarǵa berilgen jaýap unamaǵan. Bul jerde barshaǵa unaıtyn minsiz jaýap joq ekenin eskerý kerek. Qoıylǵan suraqqa shynaıy jaýap berilgen, tipti Aımaǵambetov túbirtegin de kórsetti.

Menińshe, bul – kádimgideı qalypty jaǵdaı. Mınıstrler men ákimder sheneýnikshe jumysy, jeke basy týraly qolaısyz suraqtardan jaltarmaýy kerek. Ondaı sheneýnikter bizde jetip artylady. Mınıstr, ákim, Prezıdent ákimshiliginiń basqarýshy qyzmetkeri, memlekettik holdıng basshysy saıasatker bolǵandyqtan adamdarmen qashqaqtamaı sóılesýi kerek», - dep jazdy saıasattanýshy telegram arnasynda.

Sondaı-aq, ol Prezıdent Jarlyǵymen mınıstr, ákimderdiń halyqpen kezdesýleriniń formaty ózgertilgenin eske salady.

«Mınıstrler men ákimderdiń halyqpen kezdesýi 75 paıyz dıalog túrinde ótýi kerektigi erejemen bekitilgen. Monologqa aınalmaýy kerek jáne kóshpeli bolýy shart. Eshteńe kúırep qalǵan joq. Mınıstrler, ákimder halyqtyń ortasyna emin-erkin baryp, sóılesip júr. Basshylar ol sharalardan pıar jasap jatqan joq. Muny BAQ ta, halyq ta jyly qabaqpen qabyldady. Mundaı júıeni Prezıdent ákimshiligi aıtarlyqtaı qatań qadaǵalap otyrǵanyn aıtý kerek», - dep jazdy Danııar Áshimbaev.