Mınıstrler Májilis komıtetteri otyrystaryna ózderi suranyp keledi - N.Sabılıanov
ASTANA. QazAqpart - Mınıstrler Májilis komıtetteri otyrystaryna ózderi suranyp keledi. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte QR Parlamenti Májilisiniń depýtaty Nurtaı Sabılıanov aıtty.
«Parlament Májilisiniń jalpy otyrysy ár sársenbi kúni ótetinin jaqsy bilesizder. Onda ár mınıstr óz zań jobasy boıynsha baıandama jasaıdy. Ol - bir. Ekinshiden, Parlamentte aıyna eki ret dúısenbide úkimettik saǵat bolady. Onda da mınıstrler óz mınıstrliginiń qyzmeti boıynsha baıandama jasaıdy. Al endi Parlament komıtetterine mınıstrler ózderi suranyp keledi, keı kezde. Biz osyny (mınıstrler kóterip otyrǵan máseleni) depýtattarǵa, halyqqa, BAQ-tarǵa jetkizeıik, dep ózderi keledi. Al negizinen, menińshe, mınıstrler Parlamentte kóp ýaqytyn joǵaltpaıdy. Óıtkeni, olardyń orynbasarlary, departament, komıtet basshylary kóbine zań talqylaýlarǵa qatysady», -dedi ol BAQ ókilderiniń saýalyna oraı.
Depýtattyń aıtýynsha, jalpy jumys tobyna nemese komıtetterdiń otyrystaryna mınıstrler kóp ýaqytta qatyspaıdy.
«Al, negizi biz osy jumysty mınıstrlermen birigip, birlesip otyryp sheshýdi, halyqqa qolaıly jaǵdaıdy jasaýdy qarastyrýymyz kerek. Bizdiń basty maqsatymyz - zań shyǵarý, halyqqa qyzmet etý. Mine osyny Úkimet, atqarýshy organ, Parlament birigip júzege asyrady dep oılaımyn», - dedi N.Sabılıanov.
