Mınıstrler kabıneti ÁKK-lardy damytýdyń jańartylǵan tujyrymdamasyn qabyldady
ASTANA. 23 sáýir. QazAqparat - Búgin Úkimet otyrysynda Mınıstrler kabıneti Áleýmettik-kásipkerlik korporatsııalardy damytý tujyrymdamasyna ózgertýler men tolyqtyrýlar engizý týraly jobany qabyldady.
Bul qujatty QR Óńirlik damý vıtse-mınıstri Qaıyrbek Óskenbaev tanystyrdy.
Onyń aıtýynsha, endi ÁKK-lar bıznes bastamalardy qoldaýǵa jáne óńirdiń damý núktelerinde ekonomıkalyq belsendilikti yntalandyrýǵa baǵyttalady. Sonymen qatar ÁKK-niń ınvestıtsııalyq qyzmetin nyǵaıtý maqsatynda oǵan jańa mindetterdi júkteý usynyldy.
Bul turǵyda perspektıvti jobalardy júzege asyrý úshin óńirlerge otandyq jáne sheteldik ınvestorlardy tartý, bıznesti qoldaýdyń ınfraqurylymyn damytý, basymdyqty salalarda klasterlerdi damytý, sondaı-aq iri kompanııalar aınalasynda áriptestik baǵdarlamalardy úılestirý sekildi máseleler eskerilip otyr.
Vıtse-mınıstrdiń sózine qaraǵanda, búginde ÁKK-lar baǵdarlamalar men maqsat-mindetterdiń úlken tobymen aınalysýda jáne naqty mamandandyrylmaǵan. Bul óz kezeginde kommertsııalyq, sondaı-aq kommertsııalyq emes maqsattardyń aralasýyna alyp keledi.
