Mınıstrler de, ákimder de batyl sheshim qabyldaýǵa daıyn bolýǵa tıis - Prezıdent
ASTANA. KAZINFORM - Qasym-Jomart Toqaev Jobalyq keńseniń qyzmetimen tanysty. EXPO qalashyǵynda ornalasqan Jobalyq keńse elimizde qolǵa alynǵan reformalar men strategııalyq bastamalardy júzege asyrý isine úles qosýdy kózdeıdi.
Joǵary bılik organy janyndaǵy mundaı qurylymdar álemniń birqatar elinde bar. Máselen, Ulybrıtanııada Premer-mınıstrdiń jobalyq keńsesi (Prime Minister`s Delivery Unit), Malaızııada PEMANDU, Birikken Arab Ámirlikterinde Akseleratsııa keńsesi qyzmet kórsetedi.
Jobalyq keńse Memleket basshysynyń joldaýlary men Qazaqstannyń ulttyq damý josparyndaǵy basym baǵyttardy sapaly júzege asyrýǵa arnalǵan sheshimder ázirleýmen aınalysady.
Prezıdentke fıskaldyq ornyqtylyqty arttyrýǵa arnalǵan platformalyq sheshimder engizý, Mańǵystaý oblysyn órkendetý, adamı kapıtaldy qalyptastyrý jáne damytý sekildi strategııalyq mańyzdy jobalardyń júzege asyrylý barysy baıandaldy.
Budan bólek, Tsıfrlyq damý, ınnovatsııalar jáne aeroǵarysh ónerkásibi mınıstrligi kólik-logıstıka, densaýlyq saqtaý, bilim berý jáne aǵartý isi, energetıka, sý, ónerkásip jáne qurylys, tsıfrlyq, ınnovatsııalyq ári óńirlik damý sekildi baǵyttarmen shuǵyldanatyn vedomstvoaralyq komandalardy jasaqtady. Bul naqty saladaǵy belgili bir mindetke basa nazar aýdaryp, anaǵurlym jyldam ári sapaly nátıjelerge qol jetkizýge múmkindik beredi.
Jobalarmen tanysqan Qasym-Jomart Toqaev elimizdiń áleýmettik-ekonomıkalyq damýynda aıtarlyqtaı jetistikke jetý úshin Úkimet músheleri batyl sheshim qabyldaýy kerek ekenin atap ótti.
– Aldymyzda turǵan maqsattar óte mańyzdy. Eń bastysy, Memleket basshysy bergen tapsyrmalardyń oryndalý barysyn muqııat baqylaýda ustaý qajet. Bul ortalyqtyń negizgi maqsaty – reformalardyń tıimdiligin arttyrý. Prezıdent Ákimshiligi Basshysynyń birinshi orynbasary Darhan Satybaldy osy jumysty qadaǵalaıdy. Mınıstrler de, ákimder de batyl sheshim qabyldaýǵa daıyn bolýǵa tıis. Men osyǵan deıin Úkimettiń aldyna naqty mindet qoıdym. Elimizdiń áleýmettik-ekonomıkalyq damýyna qatysty máseleler boıynsha barynsha derbes sheshim qabyldanýǵa tıis. Naqty nátıjelerdi talap etemin, – dedi Memleket basshysy.
Prezıdent mınıstrler men basshylardy birqatar mindetterdi nazarda ustaýǵa shaqyrdy.
– Biz qazir iri ınfraqurylymdyq jobalarǵa, tsıfrlandyrýǵa, jasandy ıntellekt pen ıadrolyq energetıkaǵa basa mán berip jatyrmyz. Sebebi munyń bári – memleketimizdiń negizgi strategııalyq damý baǵyttary. Úkimet osy mańyzdy máselelerdi jumys barysynda mindetti túrde eskerýge tıis, – dedi Prezıdent.
Qasym-Jomart Toqaev atom energetıkasyn damytý perspektıvasyna da toqtaldy.
– Atom elektr stantsııasynyń qurylysyn jedeldetý kerek. Men Ana tili gazetine bergen suhbatymda eki úlken stantsııa salatynymyzdy aıttym. Olardyń sany tipti úsheý bolýy da múmkin. Qazaqstandy ıadrolyq energetıkasy damyǵan, jasandy ıntellekt qoldanylatyn, tsıfrlandyrý tolyq kólemde júrgizilgen elge aınaldyrýymyz kerek, – dedi Memleket basshysy.
Eske sala keteıik, buǵan deıin Memleket basshysy Qasym-Jomart Toqaev «Ana tili» gazetine suhbat bergenin jazǵan bolatynbyz.