Mınıstrdiń uly ushaqty jarty joldan keri qaıtardy
ASTANA. QazAqparat - Iraktyń kólik mınıstri Hadı ál-Ámırıdiń uly Beırýt-Baǵdat baǵytyndaǵy ushaqqa keshigip kelip, ózin tospaı ketip qalǵan áýe kemesin jarty joldan qaıtaryp aldy, dep habarlaıdy ria.ru.
Agenttiktiń habarlaýynsha, ushaq Iraktyń kólik mınıstriniń uly Mahdı ál-Ámırı men onyń dosyn kútip, mejelengen ýaqyttan 6 mınýtqa kesh ushqan.
«Biz qajetti habarlandyrýdy jasadyq. Keıin ushaq áýege kóterilgende, jolaýshylardyń biri Irak mınıstriniń uly ekenin bildik», - dedi taıaýshyǵystyq Middle East Airlines áýejelileri agenttiginiń basshysy.
Onyń aıtýynsha, mınıstrdiń uly áýejaıǵa kelgende ashýly bolǵan jáne ol: «Men ol ushaqtyń Baǵdatqa qonýyna jol bermeımin», - dep ses kórsetken.
Ushaqtyń áýege kóterilgenine 21 mınýt bolǵanda, Baǵdat áýejaıynyń dıspetcheri oǵan qonýǵa ruqsat bermegen. Sondyqtan, ushaq Beırýtke qaıtýǵa májbúr boldy. Osy oqıǵaǵa baılanysty Iraktyń kólik mınıstri áýekemesiniń qaıtyp kelýi aerodromnyń ústin tazalaýmen baılanysty ekenin ári ulynyń ol ushaqpen ushpaýy kerektigin aıtty.
«Bul aqparat shyńdyqqa janaspaıdy. Mınıstrdiń uly bul ushaqpen qatynamaýy kerek-tin», - dedi Hadı ál-Ámırıdiń ókili.
