«Mınıstrdiń qýanyshy muǵalimge jubanysh bola ma?» - respýblıkalyq basylymdarǵa sholý
***
«Egemen Qazaqstan» basylymynyń jazýynsha, «Astana - Dostastyq elderiniń mádenı astanasy» jylyna arnalǵan forýmnyń alǵashqy kúni kópten kórispegen ejelgi dostar bir-birimen oı bólisip, biraz túıtkildiń sheshimin tabýǵa atsalyssa, erteńine elordadaǵy aıtýly oqý ornyna bas suǵýynda úlken mán bar. Qonaqtarmen jeke-jeke tanystyryp ótetin bolsaq, TMD-ǵa múshe elderdiń memleketaralyq gýmanıtarlyq yntymaqtastyq qory basqarmasynyń tóraǵasy, ánshi Polad Bıýlbıýloǵly, qor basqarmasynyń teń tóraǵasy Mıhaıl Shvydkoı, Ázerbaıjan Mádenıet jáne týrızm mınıstri Abýlfas Karaev, qordyń atqarýshy dırektory Armen Smbatıan, KSRO jáne Moldova halyq ártisi Mıhaıl Mýntıan, Moldova Respýblıkasy Mýzyka, teatr jáne beıneleý óneri akademııasynyń rektory Vıktorııa Melnık, Baký Mýzyka akademııasynyń rektory Farhad Badalbeılı. Osy aıtýly Dostastyq elderi arasyndaǵy mádenı qarym-qatynasqa tyń serpin bergen forým jaıynda «Jemisti jumys, áserli kezdesýler» atty maqaladan bilesizder.
Taıaý kúnderi Qazaq eliniń táýelsiz dıplomatııasy qurylýynyń 20 jyldyǵy atap ótiledi. Ótken eki onjyldyqta Otanymyzdyń syrtqy saıası vedomstvosy ózine júktelgen jaýapkershiligi bıik mindet údesinen shyǵatyndaı deńgeıde jumys istedi. Memleket basshysy Nursultan Nazarbaevtyń elimizdiń syrtqy saıasatyna baılanysty basymdyqtary men ıdeıalaryn ilgeriletýde biliktilik pen kásibıliktiń aıtarlyqtaı joǵary deńgeıin kórsete bildi. Elbasy ótken sáýir aıynda elimiz syrtqy saıasat vedomstvosynyń aldynda turǵan basym baǵyttardy aıqyndap, osy oraıda Syrtqy saıasat jónindegi keńes qurý týraly tapsyrma bergen bolatyn. Osy oraıda «Egemen Qazaqstan» basylymynyń búgingi sanynda Qazaqstan Respýblıkasynyń Syrtqy ister mınıstri Erjan Qazyhanovpen Prezıdenttiń atalǵan keńesti qurý týraly tapsyrmasynyń qalaı oryndalǵany, jańa qurylymnyń maqsat, mindetteri týraly bolǵan suhbaty «Syrtqy saıasat keńesi eń aldymen, Qazaqstannyń halyqaralyq ımıdjin qalyptastyrý baǵytynda jumys isteıtin bolady» atty taqyryppen jaryq kórdi.
***
«Aıqyn» basylymy búgingi sanynda «Jedel qozǵalatyn júk - tabystylyqtyń bir kilti» atty maqala basty. «Qazaqstan - shıkizat qorlaryna baı, keleshekte olardy barynsha óńdeý múmkindigi bar qarqyndy damyp kele jatqan memleket. Biraq kez kelgen ónimnen kózdelgen paıdany kórý úshin ony uqypty saqtaý, jedel tasymaldaý, tıimdi satý qajet ekenin aıtyp jatýdyń ózi artyq shyǵar. Elimizdegi Eýrazııalyq tabıǵı resýrstar korporatsııasy transulttyq kompanııasynyń beldi aktsıonerleriniń biri Aleksandr Mashkevıch Qazaqstan úshin kóliktik-logıstıkalyq keshendi damytý óte-móte qajet dep sanaıdy..» dep jazady basylym.
***
«Alash aınasy» basylymynyń jazýynsha, úzdiksiz damyp otyrýy tıis bilim salasy aldaǵy ýaqytta da reformalardan kende bolmaıdy. Keshe májilismender aldynda bilim berýdi damytý týraly memlekettik baǵdarlamanyń iske asyrylýy barysy men aldaǵy mindetteri týraly Bilim jáne ǵylym mınıstri Baqytjan Jumaǵulov esep berdi. Sonymen, orta bilim júıesin jańartý baǵytynda mınıstrlik muǵalim mártebesin kóterýdi basty mindet sanaıdy. Ol úshin eń bastysy ustazǵa laıyqty eńbekaqy tóleý qolǵa alynbaq. Osy atqarylatyn sharalar men kóterilgen máselelerdi «Alash aınasy» basylymynyń búgingi sanyndaǵy «Mınıstrdiń qýanyshy muǵalimge jubanysh bola ma?» atty maqaladan oqı alasyzdar.
Sondaı-aq osy basylymnyń jazýynsha, bıyldan bastap ózge memleketterden keletin júkterdi kedenshiler baqylasa, elimizge kiretin azamattardy shekarashylar tekseretin bolady. Osylaısha, shekarada baqylaýdyń eki-aq júıesi qalady. Olar - keden jáne shekara qyzmeti. Qazaqstannyń bas kedenshisi Májıt Esenbaevtyń boljamyna sensek, bul júıege qyrkúıekte kóshýimiz ábden múmkin. Sol kezde basqa memlekettik organdardyń ketýine baılanysty Kedendik baqylaý komıtetine qosymsha mindetter júkteledi. Biraq osy «jańa» mindetterdi qazirgi kedenshiler atqara almaıtyn sııaqty . Olardyń ornyna jas mamandar kelmek. Bul týraly «Alash aınasynyń» búgingi sanyndaǵy «Kedenshiler attestatsııadan óte ala ma?» atty maqalada baıandalǵan.
***
QR Din isteri jónindegi agenttiktiń tóraǵasy Qaırat Lama Sharıf jumys saparymen óńirge bardy. Osy sapar aıasynda ol SQO ákimdigi janyndaǵy dinı birlestiktermen baılanys jónindegi keńestiń otyrysyna qatysty. Oblys aýmaǵynda 117 dinı birlestikter qyzmet etedi. Jıyn barysynda oblysta dinı turǵyda eshqashan da kelispeýshilikter bolmaǵany aıtylǵan jáne óńirde halyqty beıbit ómirge, ózara kelisimge shaqyratyn dárister ótetini baıandaldy. Osy májiliste kóterilgen máseleler «Kazahstanskaıa pravda» basylymynyń betinde «Effektıvnaıa dıalogovaıa ploşadka » atty maqalada qozǵalǵan.
