Mınıstrdiń eskertýi: Zańsyz qarýdy tapsyryńyzdar, ózimiz tapsaq jaýapqa tartamyz
ASTANA. QazAqparat - Qazaqstanda qarýmen jasalatyn qylmys eki esege qysqardy. Bul týraly búgin halyqpen eseptik kezdesý ótkizgen QR Іshki ister mınıstri Qalmuhanbet Qasymov aıtty, dep habarlaıdy QazAqparat tilshisi.
«Qarý joǵary qaýip kózi sanalady. Olar bizdiń azamattarymyzda túrli joldarmen qolǵa túsken. Bireýlerinde ruqsat bolmaǵan kezderden beri baıaǵydan bar, endi birinde týǵan-týystarynan qalǵan. Shetelge ketip bara jatyp tastap ketkender de kezdesedi. Qarý turǵannan keıin otbasylyq-turmystyq qarym-qatynasta da qoldanylady, keıde balalar oınaıdy. Bul qaıǵyly jaıttarǵa sebep bolyp jatady. Sondyqtan 2012 jyly bizdiń azamattarymyzdyń qolyndaǵy qarýdy alý týraly sheshim qabyldandy», - dedi ol.
Onyń aıtýynsha, zańsyz qarýdy aktsııa aıasynda tapsyrǵandar jaýapkershilikke tartylmaıdy. Jumystar qolǵa alynǵan kezde el turǵyndarynan qarýlardy satyp alý úshin Úkimet shamamen 240 mln teńge bólgen. Birinshi jyly azamattar shamamen 8 myń qarý jaraq tapsyrdy.
«Oq-dáriler men jarylǵyshtardy tapsyrǵandar boldy. Tipti bir jerden taýyp alǵan granatany ótkizgender de kezdesti. Munyń barlyǵyn bizge ótkizdi, ótemaqy berdik. Bes jyldyń ishinde óte kóp qarý-jaraq qaıtaryp aldyq. Olardyń arasynda týǵan-týystarynan qalǵan tarıhı qarýlar da kezdesip, mýzeıge tapsyrdyq. Nátıje bar. Búgingi kúni qarýdyń qoldanylýymen jasalatyn qylmystar eki esege qysqardy. Muny óte jaqsy nátıje dep esepteımin», - dedi Qasymov.
Máselen, mınıstrdiń dereginshe, qarý qoldaný arqyly 2013 jyly shamamen 650 qylmys tirkelse, ótken jyly ol 300-ge deıin azaıǵan.
«Degenmen, adamdarda áli de qarý bar. Sondyqtan biz aǵymdaǵy jyly da osy maqsatqa aqsha surap otyrmyz. Azamattarǵa qarýlaryńyz bolsa tapsyrýǵa taǵy da ótinish jasaǵym keledi. Eger ózimiz tabatyn bolsaq, onda qylmystyq jaýapkershilikke tartamyz. Aktsııa bar kezde qaıtarýlaryńyzdy suraımyn», - dedi ol.
