Mınıstr jýrnalısterdi akkredıtteý týraly suraqqa jaýap berdi
ASTANA. QazAqparat - Aqparat jáne kommýnıkatsııalar mınıstri Dáýren Abaev akkredıtteýge baılanysty jýrnalısterdiń narazylyǵyna jaýap berdi, dep habarlaıdy QazAqparat.
Habar arnasynyń «Ashyq dıalog» baǵdarlamasynda Aqparat jáne kommýnıkatsııalar mınıstrinen tilshilerdi akkredıtteý boıynsha suraq qoıyldy.
«Tilshilerdi akkredıtteý sharalaryn qatańdatý ne úshin qajet boldy? Barlyq tilshiler qaýymy mundaı bastamaǵa narazy ekendikterin bildirip jatyr», - dedi baǵdarlama júrgizýshisi.
Óz kezeginde Dáýren Abaev eshqandaı ereje qatańdatylmaǵanyn aıtty.
«Ol erejeler kerek deseńiz, 2013 jyly qabyldanyp qoıǵan bolatyn. Akkredıtteý boıynsha biz eki pýnkt qana qostyq. Onyń biri - akredıtteýshi uıymnyń ishki tártibin saqtaý boıynsha tilshiniń qaǵaz júzinde kelisim berýi. Meniń oıymsha, bul oıly ári jalpy qabyldanǵan tájirıbe. Siz mýzeı nemese kitaphanaǵa barsańyz, onda saqtalýy tıis belgili bir erejeler bar. Memlekettik organdarmen de jaǵdaı solaı. Árbir memlekettik organnyń ózindik reglamenti bar. Osy reglamentti oryndaýdyń eshqandaı kúrdeliligi joq», - dedi mınıstr.
Dáýren Abaevtyń aıtýynsha, engizilgen ekinshi pýnkt - tilshi men BAQ arasyndaǵy kelisimniń baryn rastaıtyn qujattyń kóshirmesiniń bolýy.
«Máselen, osy bastamany keıbir bas redaktorlar bildirgenin aıta ketý kerek. Keıde belgili bir tilshiniń redaktsııada jumys istemese de, sharalarǵa barǵanda sol uıymnan ekenin aıtyp, kirip júrgen jaǵdaılar boldy. Bári de árbir akkredıtteý kezinde tilshi eńbek kitapshasyn alyp kelýi kerek eken dep, ashýlanyp jatyr. Tilshi árbir kelgen kezinde ony alyp kelýi mindetti emes. Bul erejeler boıynsha belgili bir organnyń barlyq sharalary úshin akredıtteý jylyna bir ret ótkiziletini bekitilgen. Bul tilshiniń de, memlekettik organnyń da jumysyn jeńildetedi», - deıdi Dáýren Abaev.
