Mınıstr júldeger sportshylarǵa baspana berý tártibin túsindirdi

NUR-SULTAN. QazAqparat – QR Mádenıet jáne sport mınıstri Aqtoty Raıymqulova júldeger sportshylarǵa baspana berý tártibi týraly aıtty, dep habarlaıdy QazAqparat tilshisi.

Búgin Parlamenti Senatynyń jalpy otyrysynda «Qazaqstan Respýblıkasynyń keıbir zańnamalyq aktilerine dene shynyqtyrý jáne sport máseleleri boıynsha ózgerister men tolyqtyrýlar engizý týraly» Zańy eki oqylymda qaralyp, qabyldandy.

«Zań jobasynda Olımpıada, Paralımpıada jáne Sýrdlımpıada oıyndarynyń chempıondary men júldegerlerine 10 jyl merzimge jalǵa berý negizinde turǵyn úı usyný, sondaı-aq dopıng-testilerdi saqtaý merzimi 10 jyl bolýyna baılanysty osy merzimge atalǵan turǵyn úıdi ıelikten shyǵarýǵa tyıym salý kózdelgen. Eger osy kezeńde synamalarda dopıng anyqtalmasa, turǵyn úı sportshynyń menshigine beriletin bolady», - dedi A. Raıymqulova Senattyń jalpy otyrysynda.

Onyń sózine qaraǵanda, Olımpıada, Paralımpıada jáne Sýrdlımpıada oıyndarynyń chempıony nemese júldegeri bolyp sanalatyn sportshy qaıtys bolǵan (qaza tapqan) jaǵdaıda, dopıngtik synamanyń nátıjesine qaramastan, muragerleriniń turǵyn úıdi óteýsiz alýy kózdelgen.

Budan buryn habarlanǵandaı, Aqtoty Raıymqulova dopıng úshin sportshylar men jattyqtyrýshylardy qandaı jaza kútip turǵanyn aıtty.

Aıta keteıik, 2013 jyldan bastap jumys isteý kezeńinde qazaqstandyq sportshylardyń dopıngti qoldanýynyń 307 oqıǵasy anyqtaldy.