Mınıstr jolaýshylar tasymalynyń sapasy týraly: Máseleni jeke baqylaýyma alamyn
NUR-SULTAN. QazAqparat - QR Indýstrııa jáne ınfraqurylymdyq damý mınıstri Roman Sklıar temir jol salasy men jolaýshylar tasymalynyń sapasyn jaqsartýdy tapsyrdy, dep habarlaıdy QazAqparat tilshisi.
«Jolaýshylarǵa qyzmet kórsetý, bılet satý, jyljymaly quram sapasy boıynsha birneshe ret synǵa ushyradyq. Sondyqtan, tutas sharalar keshenin qabyldaýymyz kerek. Bul másele meniń jeke baqylaýymda bolady, vıtse-mınıstr Berik Qamalıev te óz nazaryna alady. Alda úlken jumystar kútip tur. Jyl saıyn eń kemi 100 dana jolaýshylar vagonyn satyp alyp, parkti jańartýymyz kerek. Tapshylyqty joıý úshin «Mobıýs» júıesiniń qalaı jumys isteıtinin baqylaımyz. Qazirdiń ózinde tártip buzýshylyqtar azaıǵanyn baıqadyq», - dedi R. Sklıar mınıstrlikte ótken alqa otyrysynda.
Sonymen birge, alqa otyrysynda «Qazaqstan temir joly» UK» AQ Basqarma tóraǵasynyń orynbasary Serik Ábdenov poıyz bıletterin alypsatarlarmen qandaı kúres júrip jatqanyn aıtty.
«Bıyl 1 shildege deıin «Jolaýshylar tasymaly» AQ bılet satý úshin «Ekspress» júıesin qoldandy, onyń birqatar tehnologııalyq kemshilikteri boldy. Munda bıletti zańsyz rásimdeýge, qaıtarýǵa, qaıta satýǵa jol berildi. Sondyqtan, poıyz bıletteri 45 kún buryn satylymǵa shyǵatyndyqtan, 1 shildege deıin eski júıemen kóptegen bıletter satyp alyndy. «Mobıýs» júıesinde kútý paraqshasy paıda boldy. ıAǵnı, bılet bolmaǵan jaǵdaıda adamdar kúti paraqshasyna jazylady jáne elektrondy kezekke turady», - dep túsindirdi S. Ábdenov.
