Mınıstr jol jóndeý jumystary qalaı júrip jatqanyn ózi aralap qaıtty

NUR-SULTAN. QazAqparat - Indýstrııa jáne ınfraqurylymdyq damý mınıstri Qaıyrbek Óskenbaev Oraldan Atyraýǵa deıin kólikpen júrip ótip, joldaǵy qurylys jumystarynyń jaı-kúıimen egjeı-tegjeıli tanysýdy josparlap otyr. Vedomstvo basshysy bul týraly áleýmettik jelidegi paraqshasynda jazdy, dep habarlaıdy QazAqparat.

«Negizgi maqsatym – óńirdegi respýblıkalyq mańyzy bar joldardaǵy jóndeý jumystaryn qadaǵalaý. Aldaǵy eki kúnde Oraldan Atyraýǵa deıin kólikpen júrip ótip, joldaǵy qurylys jumystarynyń jaı-kúıimen egjeı-tegjeıli tanysýdy josparlap otyrmyn. Negizinde, jumys ornynda otyryp, máseleni syrttaı baqylap, tapsyrma berý - bir basqa. «Júz ret estigenshe, bir ret kór» demekshi, jumystar júrgizilip jatqan jerge kelip, óz kózińmen kórý - bólek», – dep jazdy Qaıyrbek Óskenbaev.

Mınıstr Oral – Kaztalovka aýyly, Kaztalovka – Jánibek – RF shekarasy, Ónege – Bısen – Saıqyn, Han Ordasy aýyly – Qurmanǵazy aýyly (Ganıýshkıno), Atyraý – Astrahan baǵyty boıynsha júrip ótpek.

Vedomstvo basshysy qazir Batys Qazaqstan oblysyndaǵy «Kaztalovka – Jánibek – RF shekarasy» jáne «Ónege – Bısen – Saıqyn» avtojoldarynda, ıaǵnı jalpy uzyndyǵy 248 shaqyrym bolatyn nysanda kúrdeli jóndeý jumystary júrip jatqandyǵyna toqtalady. Munyń 55 shaqyrymy paıdalanýǵa berilgenin atap ótken.

Buǵan deıin habarlanǵanyndaı, BQO-da jol jóndeý jumystaryna 15 mlrd teńge bólingen.