Mınıstr jol apatynyń kóbeıý sebepterin aıtty
ASTANA. KAZINFORM – Іshki ister mınıstri Erjan Sádenov Úkimet otyrysynda elde jol apattary nege kóbeıip bara jatqanyn aıtty.
«Jyl saıyn elimizde jol apatynan 2 myńnan astam adam qaza taýyp, 19 myń adam jaraqat alady.
Bul - orny tolmas shyǵyndar. Apattardyń ósýine birinshi tirkeý tásilderiniń ózgerýi áser etti. Ekinshi – avtotransporttyń ósýi. Úshinshi – ınfraqurylymnyń jaǵdaıy. Tórtinshi – júrgizýshiler tártibiniń sapasy.
Atalǵan máselelerdi sheshý joldary Qoǵamdyq qaýipsizdikti qamtamasyz etýdiń 2024-2028 jyldarǵa arnalǵan tujyrymdamasynda kózdelgen. Onyń tıimdiligi kóbine ákimdikter men ýákiletti organdardyń belsendiligine baılanysty. Qazir bul baıqalmaıdy. Qarjylandyrý qaldyq prıntsıpimen bólinedi», - degen mınıstr naqty mysal da keltirdi.
«Mysaly, «Vision Zero» baǵdarlamasy tek Almaty men Pavlodarda iske asyrylyp jatyr. Qalǵan ákimder jaraqat alýdy azaıtý baǵdarlamasynda jaǵdaıdy jaqsartý baǵytynda naqty sharalar kórsetpegen. Árıne, munyń bári jergilikti bıýdjetke baılanysty. Degenmen osynyń bári adam ómiri men densaýlyǵyna tikeleı áser etedi», - DEDІ Erjan Sádenov.
