Mınıstr jylytý maýsymyna daıyndyqty bastamaǵan kásiporyndardy synǵa aldy
ASTANA. KAZINFORM – Energetıka mınıstri Almasadam Sátqalıev aldaǵy jylý maýsymyna daıyndyq barysymen tanystyrdy.
«Elektr stantsııalaryn jóndeý grafıgine sáıkes 2024 jyly 10 energoblokty, 55 qazandyqty jáne 45 týrbınany kúrdeli jóndeý josparlanǵan. Olardyń keıbirinde qazir jóndeý jumystary júrip jatyr, al keıbirinde jóndeý aıaqtaldy. Bıyl elektr jelilerinde jalpy uzyndyǵy shamamen 20,8 myń shaqyrym elektr berý jelilerin, 423 birlik joǵary voltty kishi stantsııany kúrdeli jóndeý júrgizgeli otyrmyz», - dedi Almasadam Sátqalıev Úkimet otyrysynda.
Sondaı-aq, vedomstvo basshysy jylytý maýsymyna daıyndyqty kesh nemese áli bastamaǵan kásiporyndardy synǵa aldy.
«Rıdder jylý elektr ortalyǵynda №5 qazandyqty jóndeýdi bastaý kerek, ony jóndeý áli bastalmaǵan. Belgilengen merzimde tsırkýlıatsııalyq sý qubyryn aýystyrýdy, №4 týrbınany jóndeýdi jáne kúl úıindisin tazalaýdy aıaqtaý mańyzdy. Ekibastuz jylý elektr ortalyǵynda jóndeý jumystarynyń bastalý merzimi mamyrdan maýsymnyń úshinshi onkúndigine aýystyryldy. Bıyl qyrkúıekke deıin 4 sý jylytý qazandyǵyna josparlanǵan jóndeý jumystaryn aıaqtaý qajet. Temirtaýdaǵy ekinshi jylý elektr ortalyǵynda «Qarmet-tiń» №1 (birinshi) qazandyǵyn jóndeýdi bastaý merzimi maýsymnan tamyzǵa aıǵa shegerildi. Jumys kólemin qysqartý josparlanyp otyr. Jańa №7 qazandyqty salý jumystaryn jedeldetý qajet. Jezqazǵan jylý elektr ortalyǵynda tıisti rezervti qamtamasyz etý úshin № 5 (besinshi) qazandyqty jóndeýdi qyrkúıekke deıin jedeldetý qajet», - deıdi ol.
Odan bólek, Kentaý jylý elektr ortalyǵynda qazandyqtardy rekonstrýktsııalaý endi ǵana bastalǵan jáne Stepnogorsk jylý elektr ortalyǵynda jóndeý jumystary keıinge shegerilgen.
