Mınıstr Jeńis Qasymbek jergilikti jerde jalaqyny qalaı kóteredi
ASTANA. QazAqparat - QR Indýstrııa jáne ınfraqurylymdyq damý mınıstri Jeńis Qasymbek jergilikti jerdegi qyzmetkerlerdiń jalaqysyn qalaı kóteretinin túsindirdi, dep xabarlaıdy QazAqparat tilshisi.
Mınıstrdiń aıtýynsha, bıyldan bastap atalǵan memlekettik organ faktorly-baldyq shkalamen jalaqy taǵaıyndaý júıesine kóshedi.
«Búginde birneshe mınıstrlik ol júıege aýysty. Biz de bıyl ondaı júıeni ózimizge engizýdi josparlap otyrmyz. Birinshiden, qazir biz barlyq vakansııalardy qysqartyp jatyrmyz. Áıtpese, bos oryndar bar, biraq jarty jyl, tipti bir jyl boıy oǵan eshkim kelmeıdi. Búginde biz moratorıı jarııaladyq. Ázirshe, eshkimdi almaımyz. Sonyń esebinen jalaqynyń qory ulǵaıady. Negizi, biraz qarjy jınalaıyn dep tur», - dedi J.Qasymbek Astanada ótken jıynda.
Onyń sózine qaraǵanda, mınıstrliktiń óz ishinde jáne oǵan qarasty qurylymdardyń ákimshilik shyǵyndary barynsha qysqartylady. Ol qarajat ta jalaqyny kóterýge jumsalady.
«Osylaısha, biz eń aldymen aımaqtarda jalaqynyń kólemin ózgertýdi kózdeımiz», - dep atap kórsetti J.Qasymbek.
Aıta keteıik, jıyn barysynda mınıstr óz qyzmetkerlerine jemqorlyq úshin jumystan shyǵaratynyn eskertti.
«Ótkende QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy Alık Jatqanbaıulymen kezdeskende biz bylaı kelistik. Eger aýmaqta bir basshy ustalsa, onda osy salaǵa jaýapty komıtet tóraǵasy nemese onyń orynbasary otstavkaǵa ketýi kerek. Qazir biz agenttikpen birlesip jumys istep jatyrmyz. Bálkim, ortaq bir qujatty qabyldaımyz. Alaıda budan bylaı mende osyndaı ustanym bolady. Máselen, bir salanyń basshysy paramen ustalsa, komıtet tóraǵasynyń orynbasary jumystan ketýi tıis. Al jergilikti jerde ınspektor qolǵa tússe, birden departament basshysy jumystan ketedi», - deıdi J.Qasymbek.
