Mınıstr jeke qosalqy sharýashylyqtardy qoldaýǵa qatysty túsinik berdi
«Búgingi tańda atalǵan zań jobasy ázirlendi. Zań jobasynyń birinshi nusqasy «Ashyq normatıvtik quqyqtyq aktiler» saıtynda ornalastyryldy. Talqylaý barysynda biz 1600-ge jýyq eskertý men usynys aldyq. Atalǵan zań jobasynyń negizgi jańalyqtary mynalar: jeke qosalqy sharýashylyq qyzmetiniń zańnamalyq negizin qurý. Ókinishke qaraı, bul – adam qyzmetiniń zańmen rettelmegen salalarynyń biri. Onyń mártebesi de aıqyndalmaǵan. Biz zań jobasynda jeke qosalqy sharýashylyqty azamattyń jaldamaly jumys kúshin tartpaıtyn kásipkerlik emes qyzmeti retinde tirkedik. Ekinshiden, kooperatıvter arqyly olarǵa memlekettik qoldaý sharalaryn kórsetý úshin normalar engizildi», - dedi E. Qarashókeev Ortalyq kommýnıkatsııalar qyzmetinde.
Budan bólek mınıstr jergilikti atqarýshy organdarǵa jergilikti múmkindikter esebinen jeke qosalqy sharýashylyqtarǵa qoldaý kórsetý, jergilikti bıýdjetterge tıisti shyǵyn baptaryn engizý ókilettikteri beriletinin atap ótti.
«Munyń bári jeke qosalqy sharýashylyqtarǵa qatysty ádiletsizdikti joıý úshin óte mańyzdy. Al ol ádiletsizdiktiń bary ras. Atap aıtqanda, búginde elde 1,6 mln jeke qosalqy sharýashylyq bar, onda eldiń mal basynyń jartysyna jýyǵy shoǵyrlanǵan, olar is júzinde memleket tarapynan eshqandaı qoldaý almaı-aq eldiń ishki naryǵynyń mal sharýashylyǵy ónimderine degen qajettiliktiń jartysyna jýyǵyn qanaǵattandyryp otyr. Sonymen qatar olardy jaıylymdyq jerlermen jáne azyqpen qamtamasyz etý máseleleri áli de sheshilmegen. Bul problema jyl ótken saıyn erekshe ózektilikke ıe bola túsýde. Muny bıylǵy qurǵaqshylyq dáleldep berdi, osynyń saldarynan Mańǵystaý oblysy qatty zardap shekti», - dedi mınıstr.
«Shyn máninde, bıyl bizdegi mal sharýashylyǵy salasynyń aýa raıy jaǵdaıyna barynsha osal ekenin kórsetti. Keshe ǵana men óńirlerden kelgen fermerlermen kezdestim. Olardy tyńdaǵannan keıin men bul máseleni sheshý úshin bir rettik is-sharalar emes, júıeli sharalar qajet ekenine taǵy da kóz jetkizdim», - dedi vedomstvo basshysy.
