Mınıstr jaýapkershilik alýdan qoryqpaıtyn, tabandy bolýy qajet

«Úkimet saıası reformany Sizdiń tapsyrmańyzǵa sáıkes iske asyrýdy bastady. Osyǵan oraı memlekettik bılik tarmaqtary arasynda ókilettikti bólý boıynsha tıisti zań jobasy daıyndalyp jatyr. Sonymen qatar EKSPO-2017 kórmesine de ázirlik jumystary aıaqtalýǵa jaqyn. Halyqqa jasaǵan úndeýlerińizde berilgen tapsyrmalaryńyzdy buljytpaı oryndaý -jumysymyzdyń eń basty mindeti. Úkimet Sizdiń senimińizdi joǵary  baǵalaıdy jáne Sizdiń aldyńyzdaǵy úlken jaýapkershilikti barynsha sezinemiz», - dedi Premer-Mınıstr.

Munan keıin QR Premer-Mınıstriniń orynbasary Aýyl sharýashylyǵy mınıstri Asqar Myrzahmetov, Ulttyq ekonomıka mınıstri Tımýr Súleımenov, Qarjy mınıstri Baqyt Sultanov, Investıtsııalar jáne damý mınıstri Jeńis Qasymbek ózderi basqaratyn salalarǵa qatysty ótken jylǵy atqarylǵan jumystardyń qorytyndysy jaıynda esep berse, Shyǵys Qazaqstan oblysynyń ákimi Danıal Ahmetov, Almaty oblysynyń ákimi Amandyq Batalov, Batys Qazaqstan oblysynyń ákimi Altaı Kólginov óńirlerde atqarylǵan ister jaıynda baıandady. Ulttyq bank tóraǵasy Danııar Aqyshev elimizdiń qarjylyq ahýalyna qatysty esep berdi.

Máselen, Ulttyq ekonomıka mınıstri 2016 jyl jańa syrtqy jáne ishki jaǵdaılarǵa beıimdelý turǵysynan elimizdiń ekonomıkasy úshin syndarly sát bolǵanyn atap ótti.

«Energııa resýrstaryna baǵanyń qubylýy joǵary bolǵandyqtan jáne tutynýshylyq belsendilik tómendegendikten ekonomıkalyq belsendilik baıaýlady. Eger ótken jyldyń alǵashqy bes aıy ishinde jalpy ishki ónimniń tómendeýi baıqalsa, Sizdiń bastamańyzben qabyldanǵan «Nurly jol» memlekettik baǵdarlamasy men Daǵdarysqa qarsy jospar sheńberindegi sharalardyń arqasynda ekinshi jartyjyldyqtan bastap ósý qaıta jandandy. 2016 jyldyń qorytyndysy boıynsha jalpy ishki ónimniń ósýi bir paıyzdy qurady», - degen mınıstr aǵymdaǵy jyldyń qorytyndysynda jalpy ishki ónim ósimi 2 paıyzdyq deńgeıde kútiletindigin aıtty.

Al Asqar Myrzahmetov elimizdiń agrarlyq salasy úshin ótken jyl asa tabysty bolǵandyǵyn atap óte kele ónimder óndirisiniń ósimi 5,5 paıyzdy  quraǵandyǵyn, 23,7 mln tonna astyq bastyrylǵandyǵyn kókónis jáne baqsha ónimderiniń túsimi 5,8 mln tonnaǵa jetkenin tizip shyqty.

«Sizdiń tapsyrmańyz boıynsha ótken jyly 15 myń jeke sharýa qojalyǵyn qamtýmen 157 kooperatıv quryldy. Olardyń bazasynda júzden asa sút qabyldaý pýnktteri men jeti myń otbasylyq mal azyqtandyrý alańdary uıymdastyryldy», - dedi ol.

Jeńis Qasymbek bolsa, Joldaýda kórsetilgendeı ónerkásip óndirisiniń turaqty ósýin qamtamasyz etý úshin tórtinshi ónerkásiptik revolıýtsııa elementterin jappaı engizý kerektigin aıtty.

«Bul úshin, álemdik jetekshi kompanııalarmen seriktese jumys isteımiz. 2017 jyly jańa ekonomıkanyń elementterin keshendi qoldanýǵa ázir óńdeý sektory anyqtalatyn bolady. Atalǵan sektorlarda Indýstrııa 4.0 tehnologııasyn engizý jónindegi pılottyq jobalar júzege asyrylady. Aldaǵy ýaqytta bul tájirıbe basqa da kásiporyndar men ónerkásip sektorlarynda qoldanylatyn bolady. Tórtinshi ındýstrııa elementterin engizý kásiporyndardyń básekege qabilettiliginiń mańyzdy faktory ǵana emes, ol Qazaqstanǵa teńizge tikeleı shyǵar jolynyń joqtyǵy, ishki naryqtyń tarlyǵy, bilikti mamandardyń tapshylyǵy sııaqty faktorlardy joıýǵa múmkindik beredi», - dedi mınıstr.

Keńeıtilgen májilisti qorytyndylaǵan Memleket basshysy Úkimet músheleriniń aldyna naqty tapsyrmalar júktedi. Máselen, Elbasy jekeshelendirýdiń qarqyny baıaý júrgizilip jatqandyǵyn synady jáne Úkimetke «Yellow pages» qaǵıdasyna sáıkes memleket menshiginde qalýy tıis uıymdar men kásiporyndardyń tolyq tizimin daıyndaýdy tapsyrdy.

«Eger de uıym memlekettik múlik quramynda saqtalsa, onda osy nysan ne úshin qalyp otyrǵanyna naqty túsinik berińizder. Neden qorqamyz? Osy tizimge enbegenderdiń barlyǵyn jekeshelendirý kerek nemese 2020 jylǵa deıin joıý qajet. Budan buryn bekitilgen jekeshelendirýdiń keshendi josparyn 2020 jylda emes, 2017-2018 jyldary júzege asyrý kerek, ıaǵnı eki jyl ýaqyt berilip otyr», - dedi Memleket basshysy.

Sonymen qatar Prezıdent mınıstrler derbes sheshim qabyldaýda jaýapkershilikti moıyndaryna alýdan qashqaqtaıtyndyǵyn ashyp aıtyp, mundaı tabansyzdyqtan arylýy qajettigin qatań eskertti.

«Árbir basshy jaýapkershilikti syrǵytpaı óz moınyna alýy kerek. Biz bul týraly ana jyly Úkimetti qaıta uıymdastyrǵanda aıtqanbyz. Vıtse-premerler, mınıstrler sanyn qysqartqanda aıttyq. Ár mınıstr ózi buıryq shyǵarady, ózi sony oryndaıdy, ózi jaýap beredi. Bıýdjetke qazirden bastap kirisesińder, ár mınıstrlikke, ár óńirge aqsha bólinedi. Sony alamyz dep tyrmysyp qanshama jumys istep, dáleldedińder, aldyńdar. Endi sonyń bárin alyp uqsatyńdar, jetkizińder. Sodan keıin jaýap berińder. Másele sonda. Jaýapkershilik sondaı. Biraq, qarap otyrsań, Abaı aıtqandaı «Baıaǵy jartas, bir jartas». Báribir mınıstrler keledi de Premer-Mınıstrge  hat jazady, maǵan jazady. Vıtse-premerler bar, olarǵa hat jazady. Ózine jaýapkershilik almaıdy. Ondaı qorqaq bolsańdar mundaı jumysqa nege kelesińder? Basqa jerge  baryńdar. Qaǵazǵa qol qoımaıtyn jumystar bar, orynbasarlar bar. Bızneske baryńdar», - dedi Elbasy.

Munan bólek, Nursultan Nazarbaev Indýstrııalandyrý aıasynda 150 mlrd. teńgege salynǵan 72 kásiporynnyń áli kúnge deıin óz qýatynda ónim shyǵara almaı otyrǵandyǵyn aıtty. Bul rette Investıtsııalar jáne damý mınıstrligimen óndirisi órbimeı otyrǵan nysandar boı kótergen oblystardyń basshylaryna bul jumystardy bir yńǵaılaýdy tapsyrdy. Aýyl sharýashylyǵy salasyna bólinetin sýbsıdııa tóńireginde de túıtkildi jaıttardyń kóp ekendigin alǵa tartyp, Bas prokýratýra men Esep komıtetine  bólingen qarjynyń qalaı kádege jaratylatyndyǵyn tyńǵylyqty tekserýdi tapsyrdy.

«Munyń barlyǵy da salanyń áli kúnge deıin tıimsiz basqarylatyndyǵyn kórsetedi. Asqar Myrzahmetovke júktelgen tapsyrmalardy qamtamasyz etýdi, jaǵdaıdy túzeýdi tapsyramyn. Agroónerkásip keshenin damytýdyń negizgi baǵyttaryn biz birge anyqtadyq. Solaı ǵoı. Bekittik, aıttyq. Buǵan qosa, astyqty úsh óńirdiń ákimderimen problemaly agroholdıngter boıynsha kelisilgen sheshimdi 1 naýryzǵa deıin ázirleýdi tapsyramyn. Bul «QazEkspoAstyq» pen «Ivolgaǵa» qatysty. Ne isteý kerek? Qarańdar, shara qoldanyńdar», - dedi Memleket basshysy Aýyl sharýashylyǵy mınıstrine qarata.

Qazaqstan Prezıdenti «SK-Farmatsııa» kompanııasy tóńiregindegi bylyqtardy da tekserý qajettigin aıtyp, Densaýlyq saqtaý mınıstri Eljan Birtanovqa naqty mindetter júktedi.

«Qazir farmfabrıkalar salamyz degen bıznesmender keledi, jibermeıdi. Jer bermeımiz, tapsyrys bermeımiz, dárilerińdi satyp almaımyz dep aıtady.  Sebebi ana jaqtan, Avstralııadan, Amerıkadan kelisimshart jasap qoıdyq. Mine osy kelisimsharttyń artynda bireýler tur. Sodan paıda alyp otyr. Otandyq farmatsevtıka salasyn damytqysy kelmeıdi. Biz osyny syndyra alamyz ba, joq pa? Qazir «Farmatsııada» otyrǵandardyń bárin qýyp jiber. Jańa adamdar qoıyp, aqshanyń qaıda jumsalatynyn sheshińder. Jańa adamdar alyńdar. Men muny birneshe jyl boıy aıtyp kelemin. Eshteńe shyqpaı jatyr. Ornynan qozǵaý múmkin emes, bireýler otyr.  Olardy kim qoldaıdy? Birtanov, bul úshin sen jaýap beresiń», - dedi Nursultan Nazarbaev.

Otyrys qorytyndysynda Elbasy birneshe aıdan keıin elordamyzda «EKSPO-2017» halyqaralyq kórmesi ótetindigin eskerip, kórmege arnalǵan nysandardy keıinnen qandaı maqsattarǵa paıdalanatyndyǵymyzdy qazirden bastap sheship alý qajettigin eskertti.

Saǵyntaev Úkimet múshelerine tapsyrmalar júktedi

Osy aptada Elbasy Nursultan Nazarbaev «Qazaqstannyń úshinshi jańǵyrýy: jahandyq básekege qabilettilik» atty Qazaqstan halqyna Joldaý arnaǵan bolatyn. Osyǵan oraı, aptanyń seısenbisinde Úkimet basshysy Baqytjan Saǵyntaev Mınıstrler kabıneti músheleriniń basyn qosyp, olardyń aldyna naqty tapsyrmalar júktedi.

Atap aıtqanda, Premer-Mınıstr Aqparat jáne kommýnıkatsııalar mınıstrligine múddeli memlekettik organdarmen birlesip, «Tsıfrlyq Qazaqstan» baǵdarlamasyn ázirleýdi jáne zańnamalyq ózgeristerdi daıyndaýdy jedeldetýdi tapsyrdy.  Sonymen qatar 2020 jylǵa deıin aýyldardy talshyqty-optıkalyq jelilerge qosý máselesin erekshe baqylaýǵa alý qajettigin atap ótti.

Premer-Mınıstrdiń aıtýynsha, ınnovatsııalardy qoldaý jáne olardy óndiriske jyldam engizý de ózekti bolyp tabylady. Osyǵan baılanysty EKSPO-nyń ınfraqurylymdyq bazasynda halyqaralyq IT-startaptar tehnoparkin qurý qajet.

«Biz bul tehnoparktiń búkil dúnıe júzinen kásipkerler men ınvestorlardy tartýy úshin platformaǵa aınalýyna qol jetkizýimiz kerek. Ol úshin sáıkes ınfraqurylym men qolaıly jaǵdaılar jasalýy tıis», - dedi B. Saǵyntaev.

Bul rette Premer-Mınıstr aqparat, ulttyq ekonomıka jáne qarjy mınıstrlikterine múddeli memlekettik organdarmen birlese otyryp tehnopark qurý máselesin jáne salyq jeńildikteri, jeńildetilgen vıza jáne eńbek rejimi túrinde zańnamalyq qoldaý kórsetý máselesin pysyqtaýdy tapsyrdy. Sonymen qatar ol qazaqstandyq taýarlardy sheteldik naryqtarǵa ilgeriletý kezinde saýda kedergilerin monıtorıngileý jáne joıý boıynsha jumysty jandandyrý kerektigin atap ótti. Osyǵan baılanysty Investıtsııalar jáne damý mınıstrligine sáıkes usynystar, onyń ishinde Úkimet janynan Eksporttyq saıasat jónindegi keńes qurý boıynsha usynystar engizý tapsyryldy.