Mınıstr jas mamandarǵa: Ulttyq biliktilik testin tapsyrmaı pedagog bola almaısyzdar

NUR-SULTAN. QazAqparat – QR Bilim jáne ǵylym mınıstri Ashat Aımaǵambetov endigi ýaqytta úmitkerler muǵalimdikke ulttyq biliktilik testin tapsyrý arqyly ǵana qabyldanatynyn aıtty, dep habarlaıdy QazAqparat tilshisi.

«Sertıfıkattaý da - mańyzdy másele. №338 buıryqqa ózgerister engizilip jatyr. Bıyl ǵana bitirgen, munyń aldynda bilim ordasynda jumys istemegen, qatarymyzǵa jańadan qosylatyn áriptesterimiz endi mektepke birden kele almaıdy. Ulttyq biliktilik testileýin tapsyryp, tıisti balldy jınaǵandar ǵana jumysqa alynady. Ol sertıfıkattaý dep atalady. Mektepke kelgennen keıin de komıssııaǵa sabaǵyn kórsetip, tek dıplomy ǵana emes, onyń artynda bilimi, tájirıbesi bar ekendigin dáleldeıdi. Bul alǵash ret pedagogıkalyq mamandyqqa kelip otyrǵan adamdarǵa ǵana qatysty. Munyń aldynda jumys istep júrgen adamdarǵa qatysty emes. Sizderge bul máseleni qadap turyp, jaqsylap turyp aıtamyn. Erteń túsinbeýshilik bolmasyn», - dep eskertti Ashat Aımaǵambetov respýblıkalyq pedagogıkalyq keńeste.