Mınıstr janýarlardy qorǵaý týraly: Aıyppuldy kóbeıtý máseleni túbegeıli sheshpeıdi

NUR-SULTAN. QazAqparat – QR Ekologııa, geologııa jáne tabıǵı resýrstar mınıstri Serikqalı Brekeshev janýarlardy qorǵaý jáne adamdardyń olarǵa degen qarym-qatynasyna qatysty pikir bildirdi, dep habarlaıdy QazAqparat tilshisi.

«Janýarlardy qorǵaý jáne qamqor bolý týraly zań úı janýarlaryna tikeleı qatysty. Jylqy – ol aýylsharýashylyq janýary, sondyqtan bul másele basqa zańmen retteledi. Adamdardyń kózqarasyna keletin bolsaq, qorshaǵan orta men janýarlarǵa degen kózqarasty ózgertý kerek ekeni túsinikti. Balabaqshadan bastap búldirshinderdi flora men faýnany aıalaýǵa baýlý qajet. Bul turǵyda qoǵamnyń tárbıelik rólin jáne sana deńgeıin arttyrý qajet shyǵar», - dedi Serikqalı Brekeshev ortalyq kommýnıkatsııalar qyzmeti alańynda ótken brıfıngte.

Mınıstrdiń aıtýynsha, janýarlardy qorǵaý máselesin zańnamany únemi qatańdatý arqyly sheshý múmkin emes.

«Aıyppuldy qalaǵanyńyzsha kóbeıtýge bolady, biraq bul máseleni túbegeıli sheshpeıdi. Sondyqtan aldymen sana – sezimdi ózgertý qajet jáne ony bala kezden bastaǵan jón», - dep túsindirdi S. Brekeshev.

Buǵan deıin ekologııa mınıstri Prezıdent synynan keıin kıik popýlıatsııasyn retteý máselesi qaıta talqylanǵanyn málim etti.

Odan bólek, Serikqalı Brekeshev ıtbalyqtardyń qyrylý sebepterin túsindirip ótti.