Mınıstr jańa sý tarıfine qatysty túsinik berdi

ASTANA. KAZINFORM – Sý resýrstary jáne ırrıgatsııa mınıstri Nurjan Nurjigitov sýdy paıdalanýdyń jańa tarıfine qatysty pikir bildirdi.

«Tarıf saıasatyn Ulttyq ekonomıka mınıstrligi aıqyndaıdy. Al usynystar jergilikti atqarýshy organdardan kelip túsedi. Tarıftik saıasat 4 pozıtsııaǵa bólindi, ıaǵnı eger adam sýdy normadan kóp tutynsa, bekitilgen tarıfke sáıkes kóbirek tóleıdi. Bul qalypty tájirıbe, biz sýdy únemdep qoldanýdy úırenýimiz kerek», - dedi Nurjan Nurjigitov Májiliste ótip jatqan «Respýblıkadaǵy sarqyndy sýlardy qaıta paıdalanýdyń problemalary men perspektıvalary» atty dóńgelek ústelden keıin BAQ ókilderiniń saýalyna jaýap bere turyp.

Sondaı-aq, jýrnalıster mınıstrden «Tarıftiń ósýi taýarlar men qyzmetterdiń baǵasyna keri áser etpeı me?» dep surady.

«Tarıfti belgilegen kezde jan-jaqty qaralatyn shyǵar. Shynymdy aıtsam, bizdiń mınıstrlik tarıf baǵasyn qoıýmen aınalyspaıdy. Bul Ulttyq ekonomıka mınıstrligine qaraıtyn suraq», - dep jaýap berdi vedomstvo basshysy.

Buǵan deıin elimizde sýdy únemdep tutynýdyń jańa tarıfi engizilgeni týraly habarlaǵan edik. 

Mınıstrdiń aıtýynsha, atalǵan buıryq 11 aqpanda kúshine endi. Bekitilgen buıryqta sýdy tutyný lımıtin 4 deńgeıli tarıfpen belgileý kózdelgen.