Mınıstr volonterlik qozǵalysty damytý qadamdary týraly aıtty

NUR-SULTAN. QazAqparat – Tótenshe jaǵdaı kezeńinde elimiz boıynsha qıyn ómirlik jaǵdaıǵa tap bolǵan 1 mıllıonǵa jýyq adamǵa kómek kórsetildi. Bul týraly Aqparat jáne qoǵamdyq damý mınıstri Aıda Balaeva, dep habarlaıdy QazAqparat tilshisi.

«Memleket basshysynyń bastamasymen 2020 jyldy Volonter jyly dep jarııalanýy volonterlik qozǵalysty damytýda yntalandyrýǵa, ásirese, pandemııa kezeńinde eleýli yqpal etti. Atap aıtqanda, «Birgemiz» respýblıkalyq front-keńsesi aıasynda volonterlik shtabtar qurylyp, jedel baılanys jelisi ashyldy. Sonymen qatar, 40 myńǵa jýyq volonter jumyldyrylyp, halyqqa naqty kómek kórsetti», - dedi mınıstr Ortalyq kommýnıkatsııalar qyzmetinde onlaın rejımde ótken halyqqa esep berý kezdesýi barysynda.

Onyń sózine qaraǵanda, tótenshe jaǵdaı kezeńinde elimiz boıynsha qıyn ómirlik jaǵdaıǵa tap bolǵan 1 mıllıonǵa jýyq adamǵa kómek kórsetildi. Bul turǵyda soǵys jáne eńbek ardagerleri, qart adamdar, kópbalaly ári tabysy az otbasylar qamtyldy.

Budan buryn habarlanǵandaı, 7 qazaqstandyqty erikti retinde BUU qurylymdaryndaǵy jumysqa baǵyttaý josparlanyp otyr.