Mınıstr vırýs juqtyratyndaı Nadyrovpen betpe-bet jumys istegen joq – Bas sanıtar dáriger
«Densaýlyq saqtaý mınıstrliginiń basshylyǵy jáne jalpy mınıstrliktegi qyzmetkerlerdiń 90 paıyzy tótenshe jaǵdaı jarııalanǵaly beri qashyqtan atqarylatyn jumys tártibine kóshken. Kamaljan Nadyrovpen baılanysta bolǵan qyzmetkerlerdiń sany az. Mınıstr Eljan Birtanov Kamaljan Nadyrovpen jaqyn baılanysta bolǵan joq. Áıtse de, mınıstr de búgin test tapsyrdy. Nátıjesin onyń ózi jarııalaıdy degen oıdamyn», - dedi Aıjan Esmaǵambetova OKQ-da onlaın rejımde ótken baspasóz máslıhatynda.
Qazaqstannyń bas memlekettik sanıtar dárigeri TJ talaptaryna sáıkes, Densaýlyq saqtaý mınıstrliginiń shtattyq rejımde jumys istep jatqanyn habarlady.
«Densaýlyq saqtaý mınıstrliginiń ǵımaratyndaǵy qyzmetkerler koronavırýs ınfektsııasy boıynsha qaıta-qaıta testiden ótip júr. Testileý 2 aptada bir ret júrgiziledi. Alaıda eshbirinen koronavırýs tabylǵan joq», - dedi ol.
Aıta ketsek buǵan deıin Aıjan Esmaǵambetova osy ýaqytqa deıin Qazaqstanda koronavırýs juqtyrǵandarmen baılanysta bolǵan 40 myńǵa jýyq azamattyń anyqtalǵanyn málim etken edi. Onyń aıtýynsha mamyrdyń sońyna deıin elimizde koronavırýs juqtyrǵandar sany 4 myńǵa jetýi múmkin .