Mınıstr veterınarııa salasyndaǵy kemshilikterdi joıý qadamdaryn aıtty
NUR-SULTAN. QazAqparat – Búgin Májilistegi Úkimet saǵatynda QR Aýyl sharýashylyǵy mınıstri Erbol Qarashókeev veterınarııa salasyndaǵy kemshilikterdi joıý qadamdaryn aıtty, dep habarlaıdy QazAqparat tilshisi.
«Aýyldyq okrýgterdiń veterınarııa mamandarynda mal ıelerine ákimshilik áser etý boıynsha ókilettikterdiń bolmaýy olardy veterınarııalyq normalardy buzǵany jáne oshaqta veterınarııalyq is-sharalardy oryndamaǵany úshin jaýapkershilikke tartýdyń múmkin emestigine ákeldi. Osy maqsatta olar aýdan ortalyǵyndaǵy veterınarııalyq ınspektorlarǵa júginýge májbúr, bul veterınarııalyq qaýipsizdikti qamtamasyz etý jónindegi veterınarııalyq zańnama talaptaryn oryndaý protsesin keshiktiredi», - dedi E. Qarashókeev.
Onyń aıtýynsha, jergilikti atqarýshy organdarda veterınarııa mamandarynyń olarǵa tán emes fýnktsııalardy júzege asyrýy (qańǵybas ıtterdi aýlaý jáne aýyl sharýashylyǵy janýarlaryn qoldan uryqtandyrý) josparly is-sharalardy ýaqtyly júrgizý men tıimdiliginiń tómendeýine alyp keldi.
«Mal sharýashylyǵy ónimderine veterınarııalyq-sanıtarııalyq saraptamany lıtsenzııalaý kezinde múddeler qaqtyǵysynyń bolýy jáne pármendi baqylaýdyń bolmaýy sapasyz ónimderdi satýǵa jol berýge, sondaı-aq veterınarııalyq anyqtamalardy burmalaý faktilerine ákeldi», - dedi mınıstr.
Kórsetilgen problemalardy joıý úshin jergilikti atqarýshy organdardan Aýyl sharýashylyǵy mınıstrligi Veterınarııalyq baqylaý jáne qadaǵalaý komıtetine kelesi fýnktsııalardy berý usynylady:
- epızootııalyq oshaqtardy zerttep-qaraýdy júrgizý;
- epızootologııalyq zerttep-qaraý aktisin berý;
- aýmaqty aımaqtarǵa bólý týraly sheshim shyǵarý;
- karantındi jáne shekteý is-sharalaryn belgileý nemese alyp tastaý týraly sheshim qabyldaý;
- janýarlardan alynatyn ónim men shıkizatqa veterınarııalyq-sanıtarııalyq saraptamany lıtsenzııalaý;
- jeke jáne zańdy tulǵalardan veterınarııa salasyndaǵy kásipkerlik qyzmetti júzege asyrýdyń bastalǵany nemese toqtatylǵany týraly habarlamalar qabyldaý.
Jergilikti atqarýshy organdardyń veterınarııa mamandarynyń tán emes myna fýnktsııalaryn alyp tastaý eskerilgen:
- aýyl sharýashylyǵy janýarlaryn qoldan uryqtandyrý boıynsha qyzmetter kórsetý;
- qańǵybas ıtter men mysyqtardy aýlaý jáne jansyzdandyrý.
«Joǵaryda atalǵan fýnktsııalardy berý aýmaqtyń epızootııalyq salaýattylyǵyn qamtamasyz etýge jáne veterınarııalyq is-sharalardy júrgizýdiń jedeldigine, sondaı-aq fýnktsııalardyń arajigin naqty ajyratýǵa oń áser etedi. Jergilikti atqarýshy organdardyń veterınarııa uıymdarynyń veterınarııalyq dárigerlerine nusqamalar berý jáne ákimshilik sharalar qoldaný boıynsha qosymsha ókilettikter berý janýarlar ıelerine yqpal etý tetikteriniń bolýyna múmkindik beredi.
