Mınıstr uıaly baılanys antennalarynyń densaýlyqqa áseri týraly aıtty
«Adam densaýlyǵyna uıaly baılanys antennalarynyń áseri taqyrybyna toqtalsaq, eshbir antenna tıisti memlekettik organnyń ruqsatynsyz ornatylmaıdy», - dedi A. Jumaǵalıev Ortalyq kommýnıkatsııalar qyzmetinde.
Onyń sózine qaraǵanda, árbir bazalyq stantsııa úshin tıisti sanıtarlyq pasport beriledi.
«Turǵyn úıdiń ústine uıaly baılanys antennasy mindetti sanıtarlyq aýmaq talaptaryna sáıkes ornatylady. Sondyqtan turǵyndarǵa alańdaýdyń reti joq», - dedi mınıstr.
Sonymen qatar, A. Jumaǵalıev Qazaqstanda 5G joǵary jyldamdyqty ınternetti iske qosý jumystaryn qarjylandyrý máselesi týraly túsindirdi.
Aıta keteıik, Nur-Sultan, Almaty jáne Shymkent qalalarynda 5G pılottyq jobasy iske asyryldy.
«Jabdyqtar jumysy ınternetti óte joǵary jyldamdyqta taratý múmkindigin kórsetti. Osy baǵytqa bıýdjetten qarjy eskerilmegen, sebebi telekommýnıkatsııa jelilerin damytý baılanys operatorlary qarjysy esebinen júzege asyrylady», - dedi mınıstr.