Mınıstr: Ushaqtaǵy oryn sanynan kóp bılet satý – álemdik tájirıbe
ASTANA. KAZINFORM – Kólik mınıstri Marat Qarabaev ushaqtaǵy oryn sanynan artyq bılet satý tájirıbesi týraly óz pikirin bildirdi.
«Áýe kompanııalary ushaqtaǵy oryn sanynan kóp bılet satady, saldarynan keı jolaýshylar usha almaı qalady. Bul jumysty qandaı da bir jolmen retteý múmkin be?» - dep suraq qoıdy tilshiler Úkimette.
Óz jaýabynda mınıstr munyń halyqaralyq jáne álemdik tájirıbe ekenin, eshbir elde shekteý qoıylmaǵanyn aıtty.
«Munda birneshe bılet artyǵymen satylady jáne is júzinde keı jolaýshylar bortqa tirkelmeıdi. Sondyqtan, álemniń barlyq kompanııalary, onyń ishinde qazaqstandyq kompanııalar da osyndaı tájirıbeni qoldanady. Tutastaı alǵanda, men munyń oryndy ekenin qarastyrýǵa bolady dep oılaımyn, alaıda jan-jaqty zertteý kerek bolady. Munda sala blogerleri jáne bizdiń azamattar jekelegen buzýshylyqtar úshin aıyppuldy kóterý bastamasyn usynýda. Iá, áýe kompanııasyna aıyppuldy kóterýge bolady, biraq kompanııa bul aıyppuldy tóleý úshin bılet baǵasyn qymbattatýy múmkin», - dedi Kólik mınıstri M. Qarabaev.
Sondyqtan mınıstr bul taqyrypty depýtattarmen ári qaraı talqylaıtynyn aıtýda.
«Biz buzýshylyqtyń jekelegen túrleri úshin tek áýe kompanııasyna emes, onyń birinshi basshysyna da ákimshilik aıyppul salýdy talqylaımyz», - dedi Marat Qarabaev.
