Mınıstr ushaqta esinen tanyp qalǵan jolaýshyǵa alǵashqy medıtsınalyq kómek kórsetti

ASTANA. KAZINFORM —  Densaýlyq saqtaý mınıstri ushaqta jaǵdaıy nasharlaǵan jolaýshyǵa alǵashqy medıtsınalyq kómek kórsetti.

Threads áleýmettik jelisinde ushaqta bolǵan jolaýshylardyń biri jaǵdaıdyń beınejazbasyn jarııalady. 

– Ushaq ushaıyn dep jatqanda men uıyqtap kettim. Sol kezde daýys estildi: «Bortserik! Bortserik! Qyzdyń jaǵdaıy nasharlap ketti, dáriger kerek!»

Qasyna bir áıel kelip, onyń esin jıdyra bastady, qan qysymyn ólshedi, kóterilip ketipti. Bortserik olardan: «Sizder dárigersizder me?» dep surady. Qan qysymdy ólshegen áıel jaılap: «Dáriger», – dedi de óz isin jalǵastyrdy, – dep jazǵan Aıgúl Elemes esimdi jeli qoldanýshysy.

Oqıǵa búgin tańerteń Astana-Almaty baǵytyndaǵy KS 622 áýe reısinde bolǵan. Kýágerler dáriger jolaýshyǵa alǵashqy medıtsınalyq kómek kórsetip, jaǵdaıyn turaqtandyrýǵa járdemdeskenin aıtady. Ol qajetti keńes berip, dári-dármek qabyldaýǵa nusqaýlyq jasaǵan. Naýqastanǵan qyz ózin jaqsy sezingennen keıin sapardy jalǵastyra alatynyn aıtqan.

Belgili bolǵandaı, jolaýshyǵa alǵashqy kómek kórsetken dáriger – QR Densaýlyq saqtaý mınıstri Aqmaral Álnazarova bolyp shyqty.

– Búgin tańerteń Astana–Almaty baǵytymen ushqan áýe kemesiniń bortynda mınıstr gıpertonııalyq krız jaǵdaıyndaǵy jolaýshyǵa kómek kórsetti, – deıdi DS mınıstrligi.