Mınıstr túrme salýda memlekettik-jeke menshik áriptestik qaǵıdatyn usynady
ASTANA. 19 qarasha. QazAqparat - Elimizde túrme salý asa shyǵyndy is. Sondyqtan da, túrmelerdi memlekettik-jeke menshik áriptestik qaǵıdaty boıynsha salý usynylady.
Búgin Parlament Májilisinde ótken Úkimet saǵatynda baıandama jasaǵan Іshki ister mınıstri Qalmuhanbet Qasymov osylaı málim etti.
«Keler jyldan bastap ishki ister áskerin ońtaılandyrýdy qolǵa alatyn bolamyz. Olardy basqarý júıesi memlekettiń áskerı doktrınasyna sáıkestendiredi. Brıgadalyq qurylymnan óńirlik basqarý júıesine ótýdi kózdeımiz», - deıdi vedomstvo basshysy. Mınıstrdiń sózine qaraǵanda, osy baǵyttaǵy zańnamalyq ózgerister Májiliske joldanǵan.
Sonymen qatar, Qalmuhanbet Qasymov 2011 jylǵy tamyzdan beri ishki ister organyna berilgen qylmystyq-atqarý júıesine de toqtalyp ótti. Onyń aıtýynsha, bul baǵytta da birshama problemalar qordalanǵan. «Qazir birtindep tártipti qolǵa alyp kelemiz. Jańa baqylaý qyzmetin qalyptastyrdyq. Kóptegen uıymdastyrýshylyq máseleler qaıta qarastyrylyp jatyr», - dedi mınıstr. Budan bólek, vedomstvo basshysy eldegi túrmelerdiń basym bóligi apatty jaǵdaıda ekendigine de nazar aýdartty. «Túrmelerdiń basym bóligi qarapaıym sanıtarlyq, tehnıkalyq talaptarǵa jaýap bermeıdi. Paıdalaný merzimderi de ozdy. Sondyqtan da, olardyń halyqaralyq talaptarǵa saı kelýi týraly aıtýdyń ózi artyq. Bunymen qosa, túrme salý óte-móte shyǵyndy is. Sondyqtan da, túrmelerdi memlekettik-jeke menshik áriptestik qaǵıdaty boıynsha salýdy usynamyz. Bundaı úlgimen túrme salýdy Qaraǵandy oblysynyń ákimimen kelisip jatyrmyz», - deıdi ol.
