Mınıstr Túrkistan oblysynyń sý salasynda rotatsııa júrgizýdi tapsyrdy
ASTANA. KAZINFORM — Sý resýrstary jáne ırrıgatsııa mınıstri Nurjan Nurjigitov Túrkistan oblysynda vegetatsııa kezeńine daıyndyq máseleleri boıynsha keńes ótkizdi, dep habarlaıdy vedomstvonyń baspasóz qyzmeti.
«Qazsýshar» RMK oblystyq fılıalynyń óndiristik bólimshe basshylary mınıstrge atqarylyp jatqan jumystar týraly esep berdi. Óńir sharýalaryn sýarmaly sýmen qamtamasyz etý maqsatynda sýarý kanaldarynda sý deńgeıi tómendegen jaǵdaıda paıdalanylatyn 63 sorǵy qondyrǵysyn satyp alý jumystary júrgizilip jatyr. Jańa jabdyqtar mamyr aıynyń sońyna deıin óndiristik ýchaskelerge jetkiziledi.
Sonymen qatar Túrkistan fılıaly kanaldarda mehanıkalyq tazalaý jumystaryn júrgizip jatyr. Jyl basynan beri jalpy uzyndyǵy 316,9 shaqyrym bolatyn 118 kanal ýchaskesi tazartyldy. Jyl sońyna deıin 1800 shaqyrym kanal tazalaý josparlanyp otyr. Oblystyń Jetisaı jáne Shardara aýdandarynda tik drenajǵa arnalǵan 512 uńǵymany qalpyna keltirý jumystary aıaqtalýǵa jaqyn.
Esepterdi tyńdaǵannan keıin Nurjan Nurjigitov óndiristik bólimshe basshylaryna azamattardyń ótinishteri men shaǵymdary boıynsha jumysty kúsheıtýdi tapsyrdy.
— Men áleýmettik jelidegi barlyq pikir men hatty ózim oqımyn. Sondyqtan ár óndiristik ýchaskede ne bolyp jatqanyn jaqsy bilemin. Men úshin halyqqa kórsetiletin qyzmettiń sapasyn arttyrý mańyzdy. Mınıstrlik sý salasy qyzmetkerleriniń jalaqysyn kóterdi, júzdegen jańa arnaıy tehnıka berdi. Sondyqtan kadr men tehnıka jetispeıdi degen eski syltaýdy qoıý kerek. Sharýalardyń kómek surap kelgenin kútip otyrýdyń qajeti joq. Kerisinshe, bastamany ózderińiz jasaýlaryńyz kerek. Barlyq ótinish jedel qaralyp, týyndaǵan máseleler ýaqytynda sheshilýi qajet, — dedi Sý resýrstary jáne ırrıgatsııa mınıstri.
Keńes barysynda Nurjan Nurjigitov óndiristik ýchaskelerdegi kadrlyq rotatsııa máselesin de kóterdi. Mınıstr uzaq ýaqyt boıy basshylyq qyzmette otyrǵan mamandar arasynda rotatsııa júrgizýdi tapsyrdy.
Budan buryn Sý resýrstary mınıstrligi úsh oblystaǵy sý qoımalarynda shaǵyn SES salatynyn jazǵanbyz.
