Mınıstr Túrkistan oblysyndaǵy sý jetkizý máselesin baqylaýǵa aldy
ASTANA. KAZINFORM — Sý resýrstary jáne ırrıgatsııa mınıstri Túrkistan oblysyndaǵy egis alqaptaryn sýarmaly sýmen qamtamasyz etý barysyn tekserdi, dep habarlaıdy mınıstrliktiń baspasóz qyzmeti.
Sý resýrstary jáne ırrıgatsııa mınıstri Nurjan Nurjigitov jumys saparymen Túrkistan oblysyna baryp, óńirdegi sý sharýashylyǵy jaǵdaıymen tanysty.
Atap aıtqanda, mınıstr Shardara sý qoımasyn aralady.
28-29 shilde kúnderi Premer-mınıstrdiń orynbasary Qanat Bozymbaev bastaǵan delegatsııa Qyrǵyzstan jáne Ózbekstan úkimetterimen qýańshylyq pen sý tapshylyǵyna baılanysty tolyq jetkizilmegen sý kólemin jiberý máselesi boıynsha kelissózder júrgizgenin eske sala keteıik. Qol jetkizilgen kelisimderdiń tolyq oryndalýy Shardara sý qoımasyndaǵy sýdyń kólemin tıisti deńgeıde ustap turýǵa jáne Qyzylorda men Túrkistan oblystarynyń sharýalaryn sýarmaly sýmen shyǵynsyz qamtamasyz etýge múmkindik beredi.
Sodan keıin mınıstr «Dostyq» memleketaralyq kanalynyń jumysyn tekserdi. Qazirgi tańda Jetisaı jáne Maqtaaral aýdandaryna sý osyǵan deıin jasalǵan halyqaralyq kelisimderge sáıkes jetkizilip otyr. Dıqandarǵa sý kezekpen berilip jatyr. Bul rette kanaldyń tómengi aǵysyndaǵy sharýa qojalyqtaryna basymdyq beriledi.
Aıta keteıik, «Dostyq» memleketaralyq kanaly arqyly sýdy ótkizý jaǵdaıyn jaqsartý maqsatynda Túrkistan oblysyndaǵy «Qazsýshar» RMK fılıaly «Mashınalyq ádispen sý kóterý kanalynda» mehanıkalyq tazartý jumystaryn júrgizdi.
— Mınıstrligimiz Túrkistan oblysynda sýdyń berilýi men bólinýine táýlik boıy baqylaý júrgizip otyr. Biz jergilikti atqarýshy organdarmen tyǵyz jumys istep, kórshi elderdegi áriptestermen turaqty baılanystamyz. Óńirdegi sý sharýashylyǵy jaǵdaıyna monıtorıng júrgizip otyratyn jumys toptary quryldy. Basty mindetimiz — aýa raıynyń qolaısyz jaǵdaıyna qaramastan, sý jetkizý boıynsha kelisimshart jasasqan sharýalar aldyndaǵy mindettemelerdi oryndaý, — dedi Sý resýrstary jáne ırrıgatsııa mınıstri Nurjan Nurjigitov.
Buǵan deıin Sý resýrstary mınıstrligi sýdy ortaq paıdalanýdyń erejelerin bekitkenin habarlaǵan edik.