Mınıstr týrıster úshin qurylatyn sapar-ortalyqtarynyń jumysy týraly aıtty
«Mýzeı isindegi ekspozıtsııalardyń kelýshiler úshin qyzyqty bolýyn qamtamasyz etip, kollektsııalar men mýzeı qorlaryn tsıfrlandyrýǵa erekshe nazar aýdarý kerek. Bul másele «Qasıetti Qazaqstan» arnaıy jobasymen bite qaınasyp jatyr. Ulttyq mýzeı janynan qurylǵan «Qasıetti Qazaqstan» ǵylymı ortalyǵynyń negizgi maqsaty - elimizdegi qasıetti tarıhı oryndardy anyqtap, olardy ulttyq-ıdeologııalyq deńgeıge kóterý», - dep atap ótti mınıstr festıvaldiń ashylý saltanatynda.
Mınıstr «Ulytaý», «Otyrar», «Tańbaly» tarıhı-mádenı mýzeı-qoryqtarynyń týrıstik tartymdylyǵyn jaqsartý úshin sapar-ortalyqtar salynyp jatqanyn eske saldy. Sondaı-aq, respýblıkalyq «Bozoq», «Botaı» jáne «Saraıshyq» mýzeı-qoryqtaryn qurý jumystary júrip jatyr.
«Bul sapar-ortalyqtar zamanaýı qural-jabdyqtarmen qamtamasyz etilip, týrısterge joǵary deńgeıde qyzmet kórsetýge, mádenı-aǵartý, ǵylymı zertteý jumystaryn jandandyrýǵa úlken úles qosady. Osylaısha, buryn eleýsiz bolyp kelgen kıeli jerlerdi qorǵaý, nasıhattaý jumystary jańa sapaǵa kóteriledi», - dedi Arystanbek Muhamedıuly.
Eske sala ketsek, Astanada Mádenıet pen óner salasy qyzmetkerleriniń tuńǵysh «Rýhanı qazyna» festıvali ótip jatyr. Oǵan Semeı polıgonynyń qurbandaryna arnalǵan «Zaman-aı» ánin japon tilinde shyrqaıtyn Hırosıma ánshisi Mıchıda Rıokko arnaıy keldi.
Úsh kúnge josparlanǵan shara aıasynda plenarlyq otyrystar, sheberlik sabaqtar men pikirtalas alańdary uıymdastyrylyp, memlekettik mýzeıler men memlekettik kitaphanalar arasyndaǵy respýblıkalyq «Rýhanı qazyna - 2018» baıqaýynyń nátıjesi jarııalanady.
