Mınıstr TikTok-taǵy aqaýlarǵa baılanysty VPN qoldanbaýǵa keńes berdi

ASTANA. KAZINFORM – TikTok-qa qosylýda qıyndyqtar bolsa, VPN-di paıdalanýdan bas tartýǵa keńes beremin. Bul týraly Tsıfrlyq damý, ınnovatsııalar jáne aeroǵarysh ónerkásibi mınıstri Jaslan Mádıev málim etti.

Búgin Parlament Májilisinde tilshiler «ne sebepti VPN-di qosqan kezde TikTok jaqsy jumys isteıtinin, al VPN-siz aqaýlar shyǵatynyn» surady.

Óz kezeginde J.Mádıev TikTok-tyń jumys isteý trafıgi Mádenıet jáne aqparat mınıstrliginiń quzyretine jatatynyn aıtty.

- Bizdińshe, VPN-di paıdalanǵanda kerisinshe, kompanııanyń jumysyn, ıaǵnı TikTok-tyń qyzmetin qıyndatamyz. Nelikten? Óıtkeni ol kezde IP-adres aýysyp, qazaqtildi jáne orystildi kontenttiń moderatorlary zańǵa sáıkes kelmeıtin, ıaǵnı moderatsııaǵa jatatyn trafıkti jyldam anyqtaı almaıdy, - dedi mınıstr.

Onyń aıtýynsha, keıbir jaǵdaıda TikTok jumysynda irkilis bolsa, atalǵan kompanııa ókilderimen tıisti kelissózder bolyp jatady.

- Atap aıtqanda, trafıkti retteý Mádenıet jáne aqparat mınıstrliginiń quzyretinde. Biz ınternette TikTok qyzmetine áser etetin problemalardy kórip turǵanymyz joq, - dedi vedomstvo basshysy.

Budan buryn habarlanǵandaı, búgin Májilis Astana Hub pen Innovatsııalyq tehnologııalar parkin biriktirý týraly zań jobasyn birinshi oqylymda maquldady.