Mınıstr tabıǵı apat kezinde jedel eskertý júıesi qalaı jumys isteıtinin túsindirdi
ASTANA. KAZINFORM - 2022 jyldan 2023 jylǵa deıin Tsıfrlyq damý, ınnovatsııalar jáne aeroǵarysh ónerkásibi mınıstrligi Tótenshe jaǵdaılar mınıstrligimen birlesip Cell broadcast tehnologııasyn qoldaný arqyly tótenshe jaǵdaılarda azamattardy jedel habarlaý júıesin synaqtan ótkizdi.
Sala mınıstri Baǵdat Mýsınniń málimetinshe, bul júıe dástúrli SMS habarlamalarynan erekshelenetin jappaı eskertýge baǵyttalǵan jańa tásil bolyp tabylady.
«Onyń abonentterge joldanatyn bir rettik SMS eskertýlerden aıyrmashylyǵy — Cell broadcast tehnologııasy mıllıondaǵan azamattardy belgili bir aýmaqtaǵy tótenshe jaǵdaılar týraly der kezinde habardar etýge, eskertý habarlamasyn jedel jáne jappaı taratýdy qamtamasyz etýge arnalǵan. Cell broadcast júıesi tabıǵı apattar (mysaly, sý tasqyny, órt) nemese terrorıstik jaǵdaılar sııaqty tótenshe jaǵdaı týraly dereý habarlaýdy qajet etetin jaǵdaılarda paıdalanylady», — dedi vedomstvo basshysy.
Onyń málimetinshe, seısmologııalyq turaqsyz aımaqtardaǵy birqatar elder qazirdiń ózinde jappaı eskertý tehnologııasyn qoldanady. Mysaly, AQSh-ta bul júıeni testileý byltyr ulttyq deńgeıde ótkizildi.
Tsıfrlyq damý, ınnovatsııalar jáne aeroǵarysh ónerkásibi mınıstrligi barlyq múddeli vedomstvolarǵa qarajat bólingen jaǵdaıda Qazaqstanda Cell broadcast jedel habarlaý tehnologııasyn iske asyrýǵa daıyn ekendigi týraly habarlady. Cell broadcast tehnologııasy aqparattyq júıeni ázirleýdi jáne barlyq uıaly baılanys operatorlarymen ıntegratsııa jasaýdy qajet etedi.
«Bul júıeniń artyqshylyǵy — ony tek jer silkinisi kezinde qoldaný mindetti emes. Tótenshe jaǵdaılardyń basqa túrleri bar, mysaly, sý tasqyny, órtter nemese terrorıstik sıpattaǵy basqa da jaǵdaılar. Mundaı kezde sol aımaqtaǵy abonentterdi bolyp jatqan jaǵdaı týraly jappaı bir ýaqytta habardar etý qajet. Degenmen, seısmıkalyq belsendilikti anyqtaý júıesi men jedel jappaı eskertý arasynda ózara aıyrmashylyq bar. Seısmıkalyq belsendilikti anyqtaý júıesi jer asty dúmpýlerin anyqtaýǵa arnalǵan jabdyqty paıdalanady, al jedel eskertý júıesi turǵyndardy jedel jáne jappaı eskertý úshin Cell broadcast tehnologııasyn qoldanady», — dep túsindirdi Baǵdat Mýsın.
Detektsııa júıesi men jedel habarlaý arasyndaǵy mundaı shatastyrý pikirin boldyrmaý úshin qazir Almaty qalasy TJD ákimdikpen detektsııa júıesin tolyqqandy iske asyrý boıynsha jumys júrgizýde. Seısmologııalyq anyqtaý júıesi daıyn bolǵannan keıin Cell broadcast júıesimen muqııat túrde ıntegratsııa júrgizý qajet. Eki júıeni tolyqqandy iske asyrý jáne durys ıntegratsııalaý kezinde, seısmologııalyq júıede detektsııa paıda bolǵan kezde, Almaty qalasynyń barlyq turǵyndary úshin avtomatty túrde eskertý jasalady, sondaı-aq bul júıeni tótenshe jaǵdaıdyń basqa jaǵdaılarynda da paıdalanýǵa bolady.
«Jedel habarlaý júıesine bul tásil tıisti bıýdjet qarajatyn bólý kezinde iske asyrýǵa usynylady. Qajetti qarjylandyrý bolǵan jaǵdaıda biz osy júıeni eki aı ishinde tolyqqandy iske asyrýǵa daıynbyz», — dedi mınıstr.
