Mınıstr suıytylǵan gaz baǵasy qanshalyqty ózgeretinin aıtty
Energetıka mınıstri Almasadam Sátqalıev ishki naryqty suıytylǵan munaı gazymen qamtamasyz etý úshin lımıt bektilýi múmkin ekenin aıtty, dep habarlaıdy Kazinform agenttigi.
«Biz túsinip otyrmyz, suıytylǵan munaı gazynyń baǵasy ázirshe ózindik qunynan tómen. Osyǵan baılanysty óndirýshilerdiń ol gazdy jetkizýge yntasy joq. Onyń syrtynda suıytylǵan gaz bizdiń munaı-gaz-hımııa salasyndaǵy aýqymdy jobalarymyzǵa paıdalanylady. Ózderińiz bilesizder, biz polıpropılen jobasyn bastadyq. Qazir jobalyq qýatyna shyǵyp keledi. Polıetılen jáne býtadıen óndirisine baılanysty jobalar bar. Suıytylǵan gaz munaı-gaz-hımııa salasyndaǵy biregeı ónim dep esepteledi. Al ol jobalar jańa jumys ornyn ashýǵa, qosylǵan qun jasaýǵa kómektesedi. Osyǵan baılanysty kúrt ósken suranysty eksportqa ketetin ónimdi qaıta baǵyttaý esebinen sheshemiz. „TShO“ kompanııasy úlken qoldaý kórsetti — aı saıyn 20 myń tonna ishki naryqqa baǵyttady. Biz ol resýrstar shekteýli ekenin túsinemiz. Atalǵan munaı-gaz-hımııa zaýyty iske qosylǵannan keıin suıytylǵan munaı gazyna lımıt qoıamyz», — dedi ol Aqordada BAQ ókilderiniń suraǵyna bergen jaýabynda.
Sondaı-aq, mınıstr suıytylǵan gaz baǵasynyń kelshektegi baǵasy qansha bolatynyn aıtty.
«Osylaısha suıytylǵan munaı gazynyń baǵasyn kezeń-kezeńimen, birden ósip ketpeıtindeı etip ózindik qunyna deıin jetkizemiz. Bul naryq oıynshylarynyń shyǵynyna jol bermeý úshin kerek. Qazaqstanda qazir baǵa dıapazony bar. Bir lıtri - 50-80 teńge aralyǵynda. Degenmen bul ónimniń ózindik quny - keminde 110 teńge. Qazir ol baǵany birden qoımaımyz, kezeń-kezeńimen soǵan jetkizemiz», — dedi Almasadam Sátqalıev.
Eske salaıyq, Frantsııa Prezıdenti Qazaqstanǵa Memleket basshysy Qasym-Jomart Toqaevtyń shaqyrýymen keldi.
Sapar aıasynda eki el basshylary saýda-ekonomıkalyq, ınvestıtsııalyq jáne energetıkalyq yntymaqtastyqty nyǵaıtý, sondaı-aq halyqaralyq jáne óńirlik kún tártibindegi máselelerdi talqylaıdy dep josparlanǵan.
Aıta ketý kerek, Qazaqstan Prezıdenti Qasym-Jomart Toqaevtyń Frantsııaǵa byltyr jasaǵan resmı sapary aıasynda 35 qujatqa qol qoıylǵan bolatyn.
