Mınıstr sýperprezıdenttik pen prezıdenttik formanyń arajigin túsindirdi

NUR-SULTAN. QazAqparat – Prezıdenttiń keıbir ókilettikterin joıatyn zań jobasy Májilistiń qaraýyna osy aıda engiziledi. Bul týraly QR Ádilet mınıstri Qanat Mýsın aıtty, dep habarlaıdy QazAqparat tilshisi.

«Buryn Prezıdentte aýdan ákimderin taǵaıyndaý, olardy laýazymnan bosatý, sheshimderin ózgertý nemese kúshin joıý ókilettigi boldy. Biraq bul Prezıdenttiń jumysy ma? Árıne, joq. Sýperprezıdenttik forma degen osy. Búkil memlekettik basqarý júıesin túbine deıin jetip, olardy jóndep otyrý – bul sýperprezıdenttik forma. Qazir Prezıdent mundaı ókilettikterden arylyp jatyr. Ony sheshetin oblys ákimi, basqarý deńgeıiniń túrli ókilderi bar. Sol deńgeıde sheshilýi tıis. Sýperprezıdenttikten ketip, prezıdenttik formaǵa kóshý degenimiz osy. Bul bir ǵana mysaly», - dedi Qanat Mýsın Ortalyq kommýnıkatsııalar qyzmetindegi baspasóz máslıhaty barysynda.

Onyń aıtýynsha, «Qazaqstan Respýblıkasynyń Prezıdenti týraly» Konstıtýtsııalyq zańǵa jáne basqa da birqatar zańdarǵa engiziletin ózgeristerdi jumysshy toby pysyqtap jatyr.

«Sońǵy kezeńine shyqtyq. Jospar boıynsha sáýirdiń sońyna deıin zań jobasy Májilis qaraýyna engizilýi tıis», - dedi mınıstr.

Eske salsaq, Memleket basshysy Qasym-Jomart Toqaev Qazaqstan halqyna Joldaýynda sýperprezıdenttik basqarý formasynan kúshti Parlamenti bar prezıdenttik respýblıkaǵa kóshetindigimiz týraly aıtty.