Mınıstr sýperkompıýter qurý jóninde: bıyl jabdyqtar jetkiziledi
ASTANA. KAZINFORM – Qazaqstan qýaty kúshti sýperkompıýter qurýǵa qajet jabdyqtar taıaý arada jetkiziledi. Bul týraly Tsıfrlyq damý, ınnovatsııalar jáne aeroǵarysh ónerkásibi mınıstri Jaslan Mádıev málim etti.

Búgin Parlament Májilisinde tilshiler Qazaqstandaǵy sýperkompıýterge jabdyqtardy (chıpterdi) AQSh-tan jetkizý protsesine qatysty suraq qoıdy.
- Álemdegi úlken sýperkompıýterdiń birin qurý úshin kelissóz protsesinen óttik. Qajet ruqsattardy aldyq. Endi osy jyly kompıýterdi ákelýge tyrysamyz. Atap aıtqanda, bıyldyń birinshi jartysynda alyp kelmekpiz, - dedi J. Mádıev.
Buǵan deıin Qazaqstan qýaty kúshti sýperkompıýter qurýǵa kiriskenin jazǵan edik.
Eske salsaq, byltyr kúzde mınıstrlik sýperkompıýter úshin jabdyqqa Amerıka Qurama Shtattaryna aldyn ala tapsyrys bergenin málimdedi.
Degenmen, Qazaqstanǵa jabdyqty jetkizý merzimi AQSh úkimetiniń Qazaqstan Respýblıkasyna chıpterdi eksporttaý týraly qorytyndysyn shyǵarýyna baılanysty. Amerıkalyq tarap eksport lıtsenzııasyn alý protsesi uzaqqa sozylatynyn habarlady.
Eksporttyq lıtsenzııa alý protsesi AQSh úkimettik organdarynda belgilengen tártippen júzege asyrylady.
Sýperkompıýterdi qurý jumystary eksporttyq lıtsenzııa alynǵannan keıin jáne qajet jabdyq el aýmaǵyna jetkizilgen soń aıaqtalady.