Mınıstr: Sýdyń «qara naryǵy» bar ekeni ras

ASTANA. KAZINFORM — Májiliste ótip jatqan Úkimet saǵatynda depýtat Erlan Saıyrov «Qazsýshar» mekemesiniń menedjmentin synady.

— Óńirlerge barǵan kezde osy mekemeniń azamattary jergilikti halyqqa sýdy zańsyz beredi degen aqparat bar. Osy máseleni qashan joıasyzdar? Jylyna sý resýrstarynyń 40 paıyzy zańsyz ketedi eken. Bul qalaı? Іri jobalardy iske asyrmas buryn bar sýdy sharýashylyqqa únemdi paıdalaný máselesin kóterýimiz kerek. Sizder áli kúnge deıin bar sýdy únemdeý mehanızmin rettegen joqsyzdar, — dedi ol.

Sý resýrstary jáne ırrıgatsııa mınıstri Nurjan Nurjigitov sýdyń zańsyz saýdasy tolyq joıylmaı turǵanyn moıyndady.

— Qara naryqqa baılanysty aıtqanyńyz ras. Búgingi tańda búkil respýblıka kóleminde «Qazsýsharmen» kelisimshart jasamaı, sýdy alý degen máseleler bar. Biz ony qalaı sheship jatyrmyz? «Qazsýshar» mekemesimen qazir kelisimsharttardy jasaýdy elektrondy formatqa kóshirýge kiristik. Sebebi elektrondy túrge kóshirsek, qadaǵalaý máselesi retteledi. Odan bólek ózimizdiń aqparattyq taldaý ortalyǵy arqyly sharýa qojalyǵy sýdy kelisimshartqa saı aldy nemese kóp aldy, kassaǵa qansha aqsha tústi nemese túsken joq degen máselege ǵaryshtan monıtorıng jasaýdy engizeıin dep jatyrmyz. Ol jalpy 100 paıyz problemany sheshpeıtin shyǵar. Biraq bizge úlken qural retinde járdem kórsetedi, — dedi vedomstvo basshysy.

Sondaı-aq, mınıstr Sý kodeksi kúshine engende buryn ınspektsııalar atqaryp kelgen jumystar arnaıy komıtetke beriletinin, bul da qadaǵalaýdy bir júıege túsiretinin aıtty.

Aıta ketý kerek, Kaspıı máselesin sheshý aıasynda Qazaqstan Reseıge Edil sýyn birlesip retteý týraly usynys jasamaqshy.

Osyǵan deıin Ónerkásip jáne qurylys mınıstriniń orynbasary Qýandyq Qajkenov Májiliste ótip jatqan Úkimet saǵatynda Astananyń sýmen qamtamasyz etýge baǵyttalǵan jobalardyń qunyn atady.

Sonymen qosa Sý resýrstary mınıstri iske qosylatyn iri jobalar týraly aıtyp berdi.