Mınıstr stýdentterdi «Bolashaq» baǵdarlamasy boıynsha sý salasyna mamandanýǵa shaqyrdy

ASTANA. KAZINFORM –  Sý resýrstary jáne ırrıgatsııa mınıstri Nurjan Nurjigitov Nazarbaev ýnıversıtetinde ótip jatqan halyqaralyq forýmda stýdentterdi «Bolashaq» baǵdarlamasy boıynsha sý salasyna mamandanýǵa shaqyrdy.

«Qańtar aıynyń sońynda Ǵylym jáne joǵary bilim mınıstrligimen birlesip ótken keńeste «Bolashaq» bilim berý baǵdarlamasyna «Gıdrogeologııa», «Sý resýrstary» jáne «Sý qaýipsizdigi» sııaqty jańa sý mamandyqtar engizilgeni jarııalandy. Qazaqstandyq stýdentter osy jyldan bastap atalǵan mamandyqtar boıynsha shetelde bilim ala alady. Men barshany osy protseske belsendi atsalysýǵa shaqyramyn», - dedi Nurjan Nurjigitov.

Sondaı-aq, ol jetekshi tehnologııalardy meńgerý úshin sý salasyndaǵy ozyq jetistikteri bar eldermen tájirıbe almasý jolǵa qoıylyp jatqanyn atap ótti.

«Mınıstrlik jetekshi mamandardy tartý, otandyq kadrlardy daıarlaý jáne biliktiligin arttyrý, joǵary oqý ornynan keıingi bilim berýdiń birlesken baǵdarlamalary, sýarýdyń, únemdeýdiń jáne sýdy tazartýdyń zamanaýı tehnologııalaryn engizý sııaqty máseleler boıynsha Ulybrıtanııa, Germanııa, Frantsııa, Qytaı jáne Túrkııa syndy sheteldik seriktestermen turaqty kezdesý ótkizedi» - dedi ol.