Mınıstr stomatologııada «Sevoran» preparatyn qoldaný tájirıbesine qatysty pikir aıtty
ASTANA. KAZINFORM — Densaýlyq saqtaý mınıstri Aqmaral Álnazarova Astanada úsh jasar qyzǵa qatysty qaıǵyly jaǵdaıdan keıin stomatologııa klınıkalarynda «Sevoran» preparatyn qoldanýdy tekserý múmkindigine túsinik berdi.
Mınıstrdiń aıtýynsha, «Sevoran» men balanyń ólimi arasyndaǵy tikeleı sebep-saldar baılanysy áli anyqtalǵan joq.
- Tıisti sot-medıtsınalyq saraptama júrgizildi. «Sevoran» keńinen qoldanylyp keledi, sonyń ishinde anestezıologııa men reanımatologııada da paıdalanylyp jatyr. Osy kúnge deıin medıtsınalyq uıymdardan bul preparattarǵa qatysty janama áserler týraly resmı málimdemeler túsken joq. Sondyqtan Qazaqstanda tek túpnusqa dári-dármek qoldanylyp jatqanyn aıtqym keledi. Meniń oıymsha, tergeý amaldary barysynda máseleniń mán-jaıy anyqtalady. Sodan keıin biz tıisti sheshim qabyldaımyz», - dedi A. Álnazarova Parlament Májilisinde tilshiler suraǵyna jaýap bere otyryp.
Eske salsaq, bul qaıǵyly jaǵdaı 2024 jyldyń 30 qazanynda boldy. Úsh jasar qyz tisin emdeý kezinde narkozdan oıanbaı qalǵan. Astananyń aýdanaralyq qylmystyq soty jekemenshik stomatologııalyq klınıkanyń anestezıologyna qatysty isti qarap jatyr.
Buǵan deıin Densaýlyq saqtaý birinshi vıtse-mınıstri Tımýr Sultanǵazıev elimizdegi stomatologııalardy jappaı tekserý josparda joq ekenin aıtty.