Mınıstr sport basqarmasy basshylaryn jappaı aýystyrý sebebin túsindirdi
ASTANA. KAZINFORM — Týrızm jáne sport mınıstri Erbol Myrzabosynov birneshe óńirdegi sport jáne dene shynyqtyrý basqarmalaryndaǵy kadrlyq aýys-túıiske qatysty túsinik berdi.
«Keshe eki óńirde sport basqarmasy basshylary taǵaıyndaldy. Belgili sportshy Serik Sápıev Qaraǵandy oblysynyń sport basqarmasynyń basshysy boldy. Óńirdegi sportty damytýǵa bara jatyr. Ekinshi Pavlodar oblysy sport basqarmasynyń basshysy bolyp Azamat Imashev konkýrstan ótip, komıssııanyń sheshimimen iriktelip alynyp taǵaıyndaldy. Qazir birneshe oblysta komıssııa otyrystary ótti. Ol jerde bilikti, salany biletin, menedjerlik qabiletteri bar mamandar taǵaıyndalady», — dedi Erbol Myrzabosynov Májilis otyrysy aldynda agenttik tilshisiniń saýalyna jaýap bere turyp.
Sondaı-aq, mınıstr sport salasyndaǵy aýqymdy kadrlyq aýys-túıistiń sebebin túsindirdi.
«Sońǵy Azııa oıyndary, Olımpıada oıyndary jáne óńirlerdegi rezerv máselesi bar. Búginde mınıstrlik tarapynan arnaıy monıtorıng toby quryldy. Sol top taldaý jasap, ol jerde 3-4 jyl otyrǵan, keıin ındıkator oryndalmaǵannan keıin biz osyndaı sheshimge keldik», — deıdi ol.
Aıta ketsek, Azamat Imashev Pavlodar oblysynyń dene shynyqtyrý jáne sport basqarmasynyń basshysy bolyp taǵaıyndaldy.
Odan bólek, London Olımpıadasynyń chempıony Serik Sápıev Qaraǵandy oblystyq dene shynyqtyrý jáne sport basqarmasynyń basshysy bolatyny aıtyldy.