Mınıstr ShQO-daǵy bas ekologtyń ustalýyna qatysty pikir bildirdi

Ekologııa jáne tabıǵı resýrstar mınıstri Erlan Nysanbaev Shyǵys Qazaqstan oblysynyń bas ekologynyń ustalýyna qatysty pikir bildirdi, dep habarlaıdy Kazinform.

«Bizde osy jaıynda naqty aqparat joq, tergeý organy bul máseleni qarap jatyr. Aldaǵy ýaqytta qamaýǵa alý sebepteri týraly aqparat alamyz dep úmittenemin», - dedi E. Nysanbaev Senattaǵy parlamenttik tyńdaýdan keıin tilshiler suraǵyna jaýap bere otyryp.

Onyń aıtýynsha, qazir tıisti organnan resmı rastaıtyn málimetti almaǵan.

«Bul aqparat BAQ-ta taralǵan edi, biraq biz ekologııa departamenti dırektorynyń ustalǵany týraly resmı rastalǵan málimetti áli alǵan joqpyz. Búgin resmı aqparat alǵannan keıin, belgili bir sharalardy qabyldaımyz», - dep naqtylady mınıstr.

Aıta keteıik, búgin túske deıin Sybaılas jemqorlyqqa qarsy is-qımyl agenttiginiń resmı ókili Arman Tileýkenov ShQO Ekologııa departamenti basshysyna qatysty sotqa deıingi tergeý bastalǵanyn rastady.