Mınıstr: Saýda jelilerindegi taýardyń 70 paıyzy — otandyq azyq-túlik

Saýda oryndary sórelerindegi taýarlardyń 70 paıyzy - otandyq ónim. Bul týraly Saýda jáne ıntegratsııa mınıstri Arman Shaqqalıev aıtty, dep habarlaıdy Kazinform.

Búgin Májiliste ótken baspasóz máslıhatynda tilshiler mınıstrden Qazaqstandaǵy dúken sórelerinde Belarýs jáne Reseı taýarlarynyń qanshalyqty kóbeıgeni týraly surady.

Óz kezeginde A. Shaqqalıev osy aptanyń basynda vedomstvo bul máselege taldaý jasaǵanyn aıtty.

«Taýar satylatyn jelilerge toqtalsaq, saýda oryndary sórelerinde 60-70 paıyzǵa deıin otandyq ónim bar. Keı turǵyndar „dúkenderde Belarýstiń sút jáne shujyq ónimderi qaptap ketti“ dep aıtyp jatady. Mundaı jaǵdaı ras bolsa, onyń naqty sebebin qaraý kerek. ıAǵnı, osy ónimniń sapasy joǵary nemese baǵasy tómen bolýy múmkin. Eger sheteldik ónimniń quny tym tómen bolsa, sondaı-aq onda tańbalaý men quramy jaǵynan, qaýipsizdik turǵysynan sáıkes kelmeıtin derekter anyqtalsa, biz tıisti baqylaý jasaımyz», — dedi vedomstvo basshysy.

Onyń aıtýynsha, dúken sórelerinde kórshiles elderdiń ónimderi shamadan tys kóbeıip ketti degen málimet kelip túspegen.

«Jyldyń basynda tıisti shtab qurylǵan. Onda osy salaǵa qatysty máseleler egjeı-tegjeıli qaralady. Bizdiń qaýipsizdik ári sapa jaǵynan tyńǵylyqty tekserýge múmkindigimiz bar», — dedi Arman Shaqqalıev.