Mınıstr Sátqalıev JEO-lary tozǵan qalalardy atady

ASTANA. QazAqparat – Elimizde jylytý maýsymyna daıyndyq barysynda jylý elektr ortalyqtarynyń jol kartasy ázirlendi. Bul týraly Energetıka mınıstri Almasadam Sátqalıev málim etti, dep habarlaıdy QazAqparat tilshisi.

«Tehnıkalyq jaı-kúıi 90% deıin tozǵan jylý elektr ortalyqtary bar. Negizi ol stansalar jańaǵa aýystyrylý kerek. Jylytý maýsymyna daıyndyq barysynda eldegi bar jylý elektr ortalyqtarynyń jol kartasy ázirlendi. Biz stansalardyń qaı qazandyqtary, qandaı týrbınalar men jelilerin jóndeý kerektigin bilemiz. Rıdder, Ekibastuz, Jezqazǵan, Temirtaý, Mańǵystaý AEK jáne Kentaýdaǵy jylý elektr stansalarynyń jaǵdaıy máz emes. Stansalar tozǵan, jóndeý jumystaryn júrgizý qajet», - dedi Almasadam Sátqalıev Úkimet otyrysynan keıin BAQ ókilderiniń saýalyna jaýap bere turyp.

Mınıstrdiń aıtýynsha, atalǵan nysandardy jóndeý máselesi baqylaýda bolady.

Odan bólek, BAQ ókilderi mınıstrden «Aldaǵy jylytý maýsymynda ekibastuzdyqtardyń alańdaýyna sebep bar ma?» dep surady.

«Men Ekibastuzǵa baryp, ondaǵy jaǵdaıdy óz kózimmen kóremin. Ákimdiktiń, memlekettik energoqadaǵalaý uıymynyń málimetinshe, JEO-da jumys oıdaǵydaı júrip jatyr. Jóndeý jumystaryna qajetti jabdyq satyp alyndy. Ondaǵy jaǵdaıdy tanysqannan keıin ǵana aıta alamyn. Tamyzda – Ekibastuz jylý elektr ortalyǵyna, shildede – Rıdderge, al erteń SQO-ǵa baramyn», - dedi vedomstvo basshysy.

Sondaı-aq A. Sátqalıev Ekibastuz jylý ortalyǵyndaǵy jóndeý jumystaryn qarashaǵa deıin bitirý kerektigin aıtty.