Mınıstr əriptesin óltirgen polıtseıge qatysty mən-jaıdy aıtty
ASTANA. QazAqparat - QR Іshki ister mınıstri Qalmuhanbet Qasymov Almatyda polıtsııa qyzmetkeriniń áriptesiniń qolynan qaza tabýy oqıǵasyna qatysty pikir bildirdi, dep habarlaıdy QazAqparat tilshisi.
Mınıstr tabeldik qarýdan jaralanǵan polıtseı keshe, 26 qyrkúıek kúni kóz jumǵanyn jáne adam óltirý faktisi ózara janjal kezinde oryn alǵanyn naqtylady.
«Kúdikti kezekshilikke kelip, qarýdy qabyldaǵan. Keıin garajǵa avtokólikti alýǵa shyqqan kezde, ol týysqanymen, ıaǵnı ápkesiniń kúıeýimen jolyqqan. Ápkesiniń ortaq nekeden úsh balasy bar», - dedi Senattyń plenarlyq otyrysynan keıin tilshiler saýalyna jaýap bergen Q. Qasymov.
Belgili bolǵandaı, kóz jumǵan qyzmetker kezekshiligin tapsyrýǵa kelgen. «Sońǵy alty aı merzimde ol otbasymen birge turmaǵan kórinedi. Keshqurym qyzmetkerler kezdesip qalǵan kezde janjal týyndap, sonyń saldarynan birinshisi qarýdan oq atqan», - dep naqtylady vedomstvo basshysy.
Mınıstrdiń aıtýynsha, atalǵan fakti boıynsha qylmystyq is qozǵaldy.
Eske salaıyq, keshe, 26 qyrkúıek kúni Almatyda jergilikti polıtsııa ınspektory áriptesin qarýdan jaraqattaǵan bolatyn.
Keıin qos polıtsııa qyzmetkeri jaqyn týysqandar ekeni anyqtaldy.
Jaraqat alǵan tártip saqshysy sol kúni, túngi saǵat 22.00-de aýrýhanada kóz jumdy.
