Mınıstr Pavlodar ákimdiginiń qoqystardy kádege jarattyq degen aqparatyna kúmán keltirdi

PAVLODAR. QazAqparat – Ekologııa mınıstri Serikqalı Brekeshev ǵaryshtyq monıtorıng kezinde anyqtalǵan 165 qoqys úıindisiniń 93 paıyzy kádege jaratyldy degen ákimdik aqparatyna kúmán keltirdi, dep habarlaıdy QazAqparat tilshisi.

«Osy jyldyń 9 aıynyń qorytyndysy boıynsha qaldyqtardy qaıta óńdeý jáne kádege jaratý úlesi 20,5 paıyzdy qurady. Ótken jyly bul kórsetkish 23,8 paıyz bolǵan edi. Bul respýblıkalyq deńgeıden 24 paıyzǵa tómen. Ruqsat etilmegen qoqys úıindileriniń sany da alańdatady. Kosmomonıtorıng sheńberinde 165 qoqys úıindileri anyqtaldy. Ákimdik derekteri boıynsha onyń 93 paıyzy kádege jaratyldy. Bizdiń oıymyzsha, bul kórsetkish kúmán týdyrady, sondyqtan ákimdik zańsyz qoqys úıindilerin joıý jónindegi jumysty kúsheıtýi qajet», - dedi Pavlodar oblysynyń turǵyndarymen kezdesken Ekologııa, geologııa jáne tabıǵı resýrstar mınıstri Serikqalı Brekeshev.

Ekologııa mınıstri qoqys úıindileriniń kóp bolýy zańdastyrylǵan polıgondardyń bolmaýynan ekenin basa aıtty. Ol keltirgen derekke sáıkes, oblys aýmaǵyndaǵy qatty turmystyq qaldyqtardy tógýge arnalǵan 321 orynnyń tek beseýi ǵana sanıtarlyq talapqa saı keledi.

«Bul el boıynsha óte tómen kórsetkish. Jol kartasyna sáıkes ákimdik 10 eldi mekende polıgondardy talaptarǵa sáıkestendirý boıynsha jumys júrgizýde. Sondaı-aq, Tereńkól, Ertis jáne Maıqaıyń eldi mekenderinde qatty turmystyq qaldyqtar polıgondaryn salýǵa tehnıkalyq-ekonomıkalyq negizdeme ázirlenýde», - dep atap ótti mınıstr.

Buǵan qosa, Serikqalı Brekeshov elimizde aýaǵa bólinetin zııandy qaldyqtardyń 30 paıyzy Pavlodar oblysyna tıesili ekenin aıtty.