Mınıstr Ońtústik Koreıa kompanııalaryn Aqtaý jáne Quryq porttaryn damytýǵa shaqyrdy
ASTANA. KAZINFORM – Atalǵan porttar Orta dálizde mańyzdy ról atqaryp, Azııa men Eýropa arasyndaǵy júk tasymalynda eleýli oryn alady. Bul jóninde QR Ónerkásip jáne qurylys mınıstri Ersaıyn Naǵaspaev Qazaqstan-Koreıa birlesken komıssııasynyń saýda-ekonomıkalyq jáne ǵylymı-tehnıkalyq yntymaqtastyq boıynsha 11-otyrysynda málimdedi.
Aldymen, mınıstr energetıka jáne basqa da sektorlardaǵy ózara seriktestikke toqtaldy.
– Energetıkada basym baǵyttardyń biri – jańartylatyn energııa kózderin damytý. Doosan Enerbility kompanııasynyń energetıkalyq jobalardy júzege asyrýǵa atsalysyp jatqanyn joǵary baǵalaımyz jáne ony senimdi ári uzaq merzimdi seriktes retinde qarastyramyz, – dedi ol.
Sonymen birge, mınıstr Ońtústik Koreıa beıbit atom salasyndaǵy jahandyq kóshbasshylardyń biri ekenin málimdedi. Atalǵan el iri halyqaralyq jobalardy iske asyrýda mol tájirıbege jáne úzdik tehnologııalarǵa ıe.
Mınıstrdiń sózinshe, Qazaqstan Koreıa Respýblıkasymen beıbit atom sektorynda qos tarapqa da tıimdi bastamalardy qolǵa alýǵa daıyn.
Odan bólek, ol kólik-logıstıka baǵytyn tilge tıek etti. Mınıstr QR Prezıdentiniń Transkaspıı halyqaralyq kólik baǵytyna, ıaǵnı Orta dálizge strategııalyq mańyzdy marshrýt retinde qaraıtynyn atap ótti. Óıtkeni, ol Azııa men Eýropa arasyndaǵy kópir rólin atqarady.
– Osyǵan baılanysty KIND, Korail, Hanwha Ocean kompanııalaryn jáne Teńiz salasyn damytý boıynsha Koreıa korporatsııasyn Kaspııdiń port ınfraqurylymyn, sonyń ishinde Aqtaý men Quryq porttaryn órkendetýge qatysýǵa shaqyramyz, – dedi Ersaıyn Naǵaspaev.
Sonymen qatar, ol sırek mıneraldar, jasyl energetıka, tsıfrlyq tehnologııalar, ınfraqurylym jáne agroónerkásip keshenindegi seriktestik mańyzdy ekenin jetkizdi.
Aıta keteıik, buǵan deıin Qazaqstan men Koreıa Respýblıkasy arasyndaǵy saýda kólemi 3 mlrd dollardan asqanyn jazǵanbyz.
