Mınıstr: Óńirlerde dáriger jetispeýshiligin joıý - jergilikti organdardyń mindeti
«Dárigerlerdiń túrli deńgeıde jetispeýshiligi bar. Anestezıolog-reanımatolog, psıhıatr, terapevt, akýsher-gınekolog mamandar tapshy. Shtattyq laýazymdar tapshylyǵy joǵary emes. Búgingi kúni ol shamamen 2,5 myńǵa tómendedi. Degenmen, bul shynaıy derek emes. Shtattyq normatıv eskirgen normalarǵa sáıkes aıqyndalady jáne bos birlikterden turatynyn bilemiz. Olardy jalaqy qory bolýy úshin ádeıi bos ustaımyz», - dedi mınıstr.
Osy oraıda ol keı óńirlerde dárigerlerdiń qosymsha jumys istep júrgenine nazar aýdardy. Máselen, Shyǵys Qazaqstan oblysynda 16 dárigerdiń ornyna 10 dáriger jumys isteýge májbúr. Munyń obektıvti de, sýbektıvti de sebebi bar.
«Dárigerler men medıtsına qyzmetkerlerin jaldaý - jergilikti atqarýshy organdardyń mindeti. Bul Densaýlyq saqtaý mınıstrliginiń emes, bas dárigerdiń jumysy. Dárigerlerdiń jetkilikti sanyn oqytyp shyǵardyq. Bul jylyna shamamen 5,5-6 myń medıtsına qyzmetkerin quraıdy. Biraq, olar jumys oryndaryna jete bermeıdi. Sebebi olardy óńirler qyzyqtyra almaı otyr», - dedi E.Birtanov.
Onyń aıtýynsha, óńirlerde barlyq dárigerge birdeı áleýmettik qoldaý kórsetilmeıdi. Aýylǵa kelgen jas mamandar áleýmettik kómekti tolyq kólemde ala almaıdy.
«Aǵymdaǵy jyly túlekterdi mindetti túrde bólý jáne tańdaý quqyǵyn bastaımyz. Jas mamandarǵa eń aldymen jergilikti atqarýshy organdar tarapynan barynsha qoldaý bolatyn óńirler usynylady», - dedi mınıstr.