Mınıstr oqýshylar arasyndaǵy álimjettik jóninde: bul oqıǵalar kóbine mektepten tys bolady

ASTANA. KAZINFORM — Oqý-aǵartý mınıstri Ǵanı Beısembaev mekteptegi álimjettik pen býllıng máselesine pikir aıtty.

- Qoǵam bolyp jatqan ahýalǵa óte jiti mán beretinin kórip otyrmyz. Deıturǵanmen, osyndaı oqıǵalardyń birneshe ese tómendegenin aıta alamyz. Qazir túrli baǵdarlamalar, balalardyń qaýipsizdigine qatysty Úkimettiń jospary qabyldanǵan, sondaı-aq býllıngke qatysty birqatar joba engizildi. Bulardyń barlyǵy bilim salasyndaǵy máselelerdi ońtaıly sheshýge yqpal etip otyr. Atap aıtqanda, osy jumysty ary qaraı kúsheıtýimiz kerek. Jalpy, jaqsy kórsetkishter bar, dedi Ǵ. Beısembaev Májilistiń jalpy otyrysynan keıin tilshiler suraǵyna jaýap bere otyryp.

Onyń aıtýynsha, balalardyń qaýipsizdigine qatysty bolyp jatqan oqıǵalar Oqý-aǵartý mınıstrliginiń nazarynan tys qalmaıdy. Árbir oqıǵa jiti zerttelip otyr.

- Óıtkeni buǵan túrli jaǵdaı áser etýi múmkin. Kez kelgen oqıǵaǵa birjaqty qaraýǵa bolmaıdy. Іshki ister mınıstrligi tarapynan mektepterge belgilenetin qyzmetkerler sanyn arttyrý máselesin kóterip otyrmyz. Sebebi qazir kóp jaǵdaı mekteptiń ishinde emes, syrtynda bolyp jatyr. Mektepten tys jerde muǵalimder kezekshilik jasamaıdy ǵoı?! Sondyqtan bul máselede ýchaskelik ınspektorlardyń sanyn kóbeıtý mańyzdy, - dedi vedomstvo basshysy.

Eske salsaq, buǵan deıin Semeıde jasóspirimder altynshy synyp oqýshysyn soqqyǵa jyqqany habarlanǵan.

Al naýryz aıynyń basynda Semeı qalasynda birneshe jetkinshek jabylyp sabaǵan 6-synyp oqýshysyna Qazaqstan halqy aqsha jınastyryp, páter alyp bergeni málim boldy.

Budan bólek, bıyl qańtar aıynda Oralda mekteptegi álimjettik oqıǵasy boıynsha qylmystyq is qozǵalǵany habarlandy.

Sonymen qatar, qazaqstandyq otbasylyq psıholog, psıhoterapevt Serikgúl Sálı mekteptegi býllıng, qysymdy toqtatýdyń joldaryn atady.