Mınıstr oqýlyq sarapshylary qalaı iriktelý kerektigin aıtty
NUR-SULTAN. QazAqparat – QR Bilim jáne ǵylym mınıstri Ashat Aımaǵambetov oqýlyq avtorlary men sarapshylary arnaıy kýrstan ótetinin málim etti, dep habarlaıdy QazAqparat tilshis.
«Jaqsy muǵalimniń bári oqýlyq jaza almaıdy. Onyń óz zańdylyqtary men talaptary bar. Oqýlyq jazý men monografııa jazý eki bólek dúnıe. Osyny eskermegendikten, bizdiń balalarǵa usynatyn oqýlyqtarymyz monografııa sııaqty bolyp ketip júr. Ondaı oqýlyqty balanyń túsinýi qıyn. Sondyqtan, oqýlyq avtorlarynyń ózin oqytý kerek», - dedi Ashat Aımaǵambetov.
Áýeli oqýlyq sapasyn saraptaıtyn mamandar oqytylatyn bolady. Sol úshin eldegi 1000 úzdik muǵalim iriktelip, arnaıy kýrstan ótedi.
«Jyl saıyn arnaıy kýrstan ótken sarapshylardyń ishinen úzdikteri jasyryn ádis arqyly tańdap alynady. Osydan keıin oqýlyq avtorlaryn oqytamyz. Bizde avtorlar kóp emes, sonda da oqytamyz», - dedi vdeomstvo basshysy.
Ashat Aımaǵambetov oqýlyqty saraptaý júıesi qalaı jumys isteıtinin túsindirdi.
«Sarapshylar oqýlyqty baǵalaý úshin bas qalaǵa eki ret keledi. Ár kelgende bir apta ǵana ýaqyt beriledi. Olarǵa úlken oqýlyq ustatady. Elordada otyryp, bir aptanyń ishinde ony saraptap shyǵý múmkin emes. Oqýlyqty tolyq saraptaý úshin sýretterin, kartalardy, kestelerdi, esepter men onyń sheshý joldaryn, jalpy mazmuny men pýnktýatsııasyn tekserip shyǵý kerek. Osynyń bárin bir aptada tyndyrý qanshalyqty múmkin? Mundaı júıe bizge unamaıdy. Sarapshylar oqýlyq synaqtan ótpeı turyp maketimen tanysýy kerek. Ol úshin arnaıy elektrondy platforma qurylady. Sol arqyly aqparat almasyp, júıeli negizde jumys isteıtin bolamyz», - dedi mınıstr.
